ఏపీలో స్థానిక సంస్థల ఎన్నికలకు 28 మంది ఐఏఎస్‌లు పరిశీలకులు
నిష్పక్షపాతంగా, పారదర్శకంగా ఎన్నికలు నిర్వహించాలి: ఎన్నికల కమిషనర్ అనిల్‌చంద్ర పునేఠా
అమరావతి (ఎన్ టుడే న్యూస్): ఆంధ్రప్రదేశ్‌లో స్థానిక సంస్థల ఎన్నికల నిర్వహణ కోసం రాష్ట్ర ఎన్నికల సంఘం 28 మంది ఐఏఎస్ అధికారులను పరిశీలకులుగా నియమించింది. ఎన్నికలు నిష్పక్షపాతంగా, పారదర్శకంగా జరిగేలా అధికారులు బాధ్యతాయుతంగా వ్యవహరించాలని రాష్ట్ర ఎన్నికల కమిషనర్ అనిల్‌చంద్ర పునేఠా సూచించారు.
ఎన్నికల కోడ్ అమలుపై నిరంతరం పర్యవేక్షణ చేపట్టాలని, రాజకీయ ప్రతినిధులు ఎన్నికల నియమావళిని ఉల్లంఘించకుండా తగిన చర్యలు తీసుకోవాలని ఆయన ఆదేశించారు. నిబంధనల ఉల్లంఘనలు గుర్తించినప్పుడు చట్ట ప్రకారం చర్యలు చేపట్టాలని స్పష్టం చేశారు.
ఎన్నికల నిర్వహణలో సాంకేతిక పరిజ్ఞానాన్ని సమర్థంగా వినియోగించుకోవాలని, జిల్లా పోలీసు యంత్రాంగంతో సమన్వయం చేసుకుంటూ ముందుకు సాగాలని పరిశీలకులకు సూచించారు. ఓటర్లపై ఒత్తిళ్లు, ప్రలోభాలకు తావులేకుండా చర్యలు తీసుకోవాలని ఎన్నికల సంఘం స్పష్టం చేసింది.
