పుంగనూరు మున్సిపాలిటీలో టీడీపీ నుంచి 78 నామినేషన్లు..
వైసీపీ నుంచి ఒక్కటీ లేదు!
మొత్తం 100 నామినేషన్లు దాఖలు
చైర్మన్ అభ్యర్థిగా నయీమ్ తాజ్ పేరు ప్రచారం
పుంగనూరు: పుంగనూరు మున్సిపాలిటీలో నామినేషన్ల ప్రక్రియ ముగియడంతో రాజకీయంగా ఆసక్తికర పరిస్థితులు నెలకొన్నాయి. మూడు రోజులపాటు సాగిన నామినేషన్ల ప్రక్రియలో మొత్తం 100 నామినేషన్లు దాఖలైనట్లు సమాచారం.
వీటిలో తెలుగుదేశం పార్టీ నుంచి 78, జనసేన నుంచి 11, బీజేపీ నుంచి 5, ఇతరుల నుంచి 4, సీపీఐ నుంచి ఒకటి, ఎసీపీఐ నుంచి ఒక నామినేషన్ దాఖలైనట్లు తెలుస్తోంది. అయితే, వైఎస్సార్ కాంగ్రెస్ పార్టీ నుంచి ఒక్క నామినేషన్ కూడా దాఖలు కాకపోవడం స్థానికంగా చర్చనీయాంశంగా మారింది. ఇందుకు గల కారణాలపై అధికారిక స్పష్టత రావాల్సి ఉంది.
చైర్మన్ అభ్యర్థిగా నయీమ్ తాజ్ పేరు
పుంగనూరు మున్సిపల్ చైర్మన్ అభ్యర్థిగా నయీమ్ తాజ్ పేరును టీడీపీ అధిష్ఠానం ఖరారు చేసినట్లు పార్టీ వర్గాల్లో ప్రచారం జరుగుతోంది. దీనిపై పార్టీ నుంచి అధికారిక ప్రకటన వెలువడాల్సి ఉంది.
ఘర్షణల నేపథ్యంలో కట్టుదిట్టమైన భద్రత
నామినేషన్ల మొదటి రోజు చోటుచేసుకున్న ఘర్షణల నేపథ్యంలో పోలీసులు భద్రతను కట్టుదిట్టం చేశారు. ఈ ఘటనకు సంబంధించి పలువురిపై కేసులు నమోదైనట్లు సమాచారం.
ప్రస్తుతం అందరి దృష్టి నామినేషన్ల పరిశీలన, ఉపసంహరణ ప్రక్రియపై ఉంది. అభ్యర్థుల తుది జాబితా వెలువడిన తర్వాత ఎన్నికల బరిలో నిలిచే వారి సంఖ్యపై స్పష్టత రానుంది.
