చాట్రాయి మండలంలో 84 నామినేషన్లు.. వయస్సు సరిపోక ఒకటి తిరస్కరణ

15 ఎంపీటీసీ స్థానాలకు 83 నామినేషన్లు సక్రమం 

చాట్రాయి, అక్టోబరు 24 : ఏలూరు జిల్లా నూజివీడు నియోజకవర్గంలోని చాట్రాయి మండలంలో 15 ఎంపీటీసీ స్థానాలకు మొత్తం 84 నామినేషన్లు దాఖలైనట్లు ఎన్నికల రిటర్నింగ్ అధికారి అనురాధ తెలిపారు. నామినేషన్ల పరిశీలన ప్రక్రియ పూర్తికాగా, ఒక నామినేషన్‌ను తిరస్కరించినట్లు వెల్లడించారు. మండలంలో తెలుగుదేశం పార్టీ తరఫున 34 మంది, వైఎస్సార్ కాంగ్రెస్ పార్టీ తరఫున 35 మంది, జనసేన పార్టీ తరఫున ఆరుగురు, సీపీఐ ఎంఎల్ లిబరేషన్ తరఫున ఒకరు, స్వతంత్ర అభ్యర్థులుగా ఇద్దరు నామినేషన్లు దాఖలు చేశారు. మొత్తం 84 నామినేషన్లలో కృష్ణారావుపాలెం ఎంపీటీసీ స్థానానికి వైఎస్సార్ కాంగ్రెస్ పార్టీ తరఫున నామినేషన్ దాఖలు చేసిన ఎం. నవ్యకు పోటీ చేయడానికి అవసరమైన కనీస వయస్సు 21 సంవత్సరాలు నిండకపోవడంతో ఆమె నామినేషన్‌ను తిరస్కరించినట్లు అనురాధ తెలిపారు. మిగిలిన 83 నామినేషన్లు నిబంధనలకు అనుగుణంగా సక్రమంగా ఉన్నట్లు స్పష్టం చేశారు. ఈ నెల 27న నామినేషన్ల ఉపసంహరణకు అవకాశం ఉండటంతో ఆ ప్రక్రియ అనంతరం ఎన్నికల బరిలో మిగిలే అభ్యర్థుల సంఖ్యపై స్పష్టత రానుంది. ఉపసంహరణల తర్వాత 15 ఎంపీటీసీ స్థానాలకు పోటీ చేసే అభ్యర్థుల తుది జాబితా ఖరారు కానుంది. ఈ కార్యక్రమంలో సబ్‌ కలెక్టర్ వినూత్న, ఎంపీడీవో బి.ఏ. సత్యనారాయణ, తహసీల్దార్ జి. శ్వేత తదితరులు పాల్గొన్నారు.