రాత్రి నూడుల్స్ తిని నిద్రపోయిన కుటుంబం.. తెల్లారేసరికి ఐదుగురు మృతి!
గ్రేటర్ నోయిడాలో విషాద ఘటన.. ఫుడ్ పాయిజనింగ్‌పై పోలీసుల అనుమానం
ఉత్తరప్రదేశ్‌లోని గ్రేటర్ నోయిడాలో తీవ్ర విషాదం చోటుచేసుకుంది. ఒకే కుటుంబానికి చెందిన దంపతులతో పాటు ముగ్గురు చిన్నారులు మృతిచెందడం కలకలం రేపింది. రాత్రి భోజనంగా నూడుల్స్ తిని, టీ తాగిన కుటుంబ సభ్యులు నిద్రపోయారని, ఉదయానికి విగతజీవులుగా కనిపించారని మృతుడి తల్లి తెలిపినట్లు సమాచారం.
కుటుంబ సభ్యుల మృతికి ఆహారం కలుషితం కావడం వల్ల సంభవించిన ఫుడ్ పాయిజనింగ్ కారణమై ఉండొచ్చని పోలీసులు అనుమానిస్తున్నారు. అయితే మరణాలకు అసలు కారణం ఏమిటనేది ఇంకా నిర్ధారణ కాలేదు.
ఘటనపై దర్యాప్తు చేపట్టిన అధికారులు, కుటుంబ సభ్యులు తిన్న ఆహార పదార్థాల నమూనాలను సేకరించి ప్రయోగశాలకు పంపించారు. మృతదేహాలను పోస్టుమార్టం నిమిత్తం ఆసుపత్రికి తరలించారు. పోస్టుమార్టం నివేదిక, ఆహార నమూనాల పరీక్షల ఫలితాలు వచ్చిన తర్వాతే మరణాలకు గల అసలు కారణం వెల్లడయ్యే అవకాశం ఉంది.
