ఎన్నికల నిబంధనలు ఉల్లంఘిస్తే చర్యలు
- చెల్లింపు ప్రచారాలు, ప్రాయోజిత పోస్టుల ఖర్చులు ఎన్నికల వ్యయంలోకి
- ప్రచార ప్రకటనలకు ఎంసీఎంసీ ముందస్తు అనుమతి తప్పనిసరి
- అభ్యంతరకర ప్రచారానికి దూరంగా ఉండాలి
- చెల్లింపు ప్రచారాల ఖర్చులు నమోదు చేయాలి
- ప్రచార ప్రకటనలకు ముందస్తు అనుమతి
మదనపల్లి, అక్టోబర్‌ 25 | ఎన్ టుడే న్యూస్‌:
స్థానిక సంస్థల ఎన్నికల నేపథ్యంలో సామాజిక మాధ్యమాల్లో ప్రచార సామగ్రిని రూపొందించి ప్రచురించే కంటెంట్‌ క్రియేటర్లు, సోషల్‌ మీడియా ఇన్‌ఫ్లూయెన్సర్లు ఎన్నికల నిబంధనలను తప్పనిసరిగా పాటించాలని అన్నమయ్య జిల్లా కలెక్టర్‌, జిల్లా ఎన్నికల అధికారి నిశాంత్‌కుమార్‌ సూచించారు. ఎన్నికల ప్రవర్తనా నియమావళిని ఉల్లంఘించే చర్యలకు పాల్పడితే నిబంధనల ప్రకారం చర్యలు తీసుకుంటామని స్పష్టం చేశారు.
సామాజిక మాధ్యమాల్లో పోస్టులు, చిత్రాలు, వీడియోలు, లఘుచిత్రాలను ప్రచురించే సమయంలో జాగ్రత్తగా వ్యవహరించాలని కలెక్టర్‌ సూచించారు. కులాలు, మతాలు, వర్గాల మధ్య విభేదాలు సృష్టించేలా, శాంతిభద్రతలకు విఘాతం కలిగించేలా లేదా అభ్యర్థుల వ్యక్తిగత ప్రతిష్ఠకు భంగం కలిగించేలా ప్రచార సామగ్రిని రూపొందించకూడదని పేర్కొన్నారు.
ఇన్‌స్టాగ్రామ్‌, ఫేస్‌బుక్‌, యూట్యూబ్‌ తదితర సామాజిక మాధ్యమాల్లో ప్రచురించే ఎన్నికల ప్రచార అంశాలపై పర్యవేక్షణ బృందాలు నిఘా ఉంచుతాయని తెలిపారు. ఎన్నికల ప్రక్రియ ప్రశాంతంగా, స్వేచ్ఛగా, పారదర్శకంగా సాగేందుకు ప్రతి ఒక్కరూ బాధ్యతాయుతంగా వ్యవహరించాలని కోరారు.
రాజకీయ పార్టీలు, పోటీ చేసే అభ్యర్థుల తరఫున సామాజిక మాధ్యమాల్లో నిర్వహించే చెల్లింపు ప్రచారాలు, ప్రాయోజిత పోస్టులు, ప్రచార ఒప్పందాల ద్వారా చేపట్టే కార్యక్రమాలకు సంబంధించిన ఖర్చులను ఎన్నికల వ్యయ పరిశీలనలో పరిగణనలోకి తీసుకుంటామని కలెక్టర్‌ తెలిపారు.
సోషల్‌ మీడియా ద్వారా ప్రచారం నిర్వహించే వ్యక్తులు లేదా సంస్థలకు చెల్లించే రుసుముల వివరాలను పారదర్శకంగా నమోదు చేసి, ఎన్నికల అధికారులకు వెల్లడించాలని సూచించారు. ఎన్నికల వ్యయానికి సంబంధించిన వివరాలను నిబంధనల ప్రకారం నిర్వహించాల్సి ఉంటుందని స్పష్టం చేశారు.
అభ్యర్థులకు సంబంధించిన ప్రచార ప్రకటనలు, వీడియోలు, ఇతర ఎన్నికల ప్రచార సామగ్రిని సామాజిక మాధ్యమాల్లో ప్రచురించే ముందు వర్తించే నిబంధనల ప్రకారం జిల్లా స్థాయి మీడియా ధ్రువీకరణ, పర్యవేక్షణ కమిటీ (ఎంసీఎంసీ) నుంచి ముందస్తు అనుమతి పొందాలని కలెక్టర్‌ సూచించారు.
ఎన్నికల నియమావళిని పాటిస్తూ, ప్రజలకు బాధ్యతాయుతమైన సమాచారాన్ని అందించాలని కంటెంట్‌ క్రియేటర్లు, సోషల్‌ మీడియా ఇన్‌ఫ్లూయన్సర్లు, రాజకీయ పార్టీలు, అభ్యర్థులకు ఆయన విజ్ఞప్తి చేశారు.
