రంగారెడ్డి జిల్లాకు ఈఎస్ఐ సూపర్ స్పెషాలిటీ ఆసుపత్రి మంజూరు చేయాలి

కార్మికుల వైద్య సౌకర్యాల కోసం ఏఐటీయూసీ పోరాటం: రాష్ట్ర కార్యదర్శి పానుగంటి పర్వతాలు

ఈఎస్ఐ డైరెక్టర్‌ ప్రియరంజన్‌ సిన్హాకు వినతిపత్రం అందజేత

రంగారెడ్డి, అక్టోబర్‌ 23 (ఎన్‌ టుడే న్యూస్‌): పారిశ్రామికంగా వేగంగా అభివృద్ధి చెందుతున్న రంగారెడ్డి జిల్లాలో కార్మికుల అవసరాలకు అనుగుణంగా మల్టీ సూపర్‌ స్పెషాలిటీ ఈఎస్ఐ ఆసుపత్రిని మంజూరు చేయాలని ఏఐటీయూసీ రాష్ట్ర కార్యదర్శి పానుగంటి పర్వతాలు ప్రభుత్వాన్ని డిమాండ్‌ చేశారు. జిల్లాలో లక్షలాది మంది కార్మికులు, సాఫ్ట్‌వేర్‌ ఉద్యోగులు పనిచేస్తున్నప్పటికీ, వారికి అందుబాటులో పూర్తిస్థాయి ఈఎస్ఐ వైద్య సదుపాయాలు లేకపోవడం ఇబ్బందికరంగా మారిందని పేర్కొన్నారు.

ఈ మేరకు ఏఐటీయూసీ ప్రతినిధి బృందం గురువారం ఈఎస్ఐ డైరెక్టర్‌ ప్రియరంజన్‌ సిన్హాను కలిసి వినతిపత్రం అందజేసింది. ఈ బృందంలో ఏఐటీయూసీ రంగారెడ్డి జిల్లా ప్రధాన కార్యదర్శి దత్తు నాయక్‌, జిల్లా అధ్యక్షుడు వడ్ల సత్యనారాయణ, జిల్లా కార్యనిర్వాహక అధ్యక్షుడు పద్ధతి లక్ష్మణ్‌, జిల్లా సహాయ కార్యదర్శి నాగరాజు పాల్గొన్నారు.

లక్షలాది మంది కార్మికులకు వైద్య సదుపాయాలు కల్పించాలి

ఈ సందర్భంగా పానుగంటి పర్వతాలు మాట్లాడుతూ, షాద్‌నగర్‌ నుంచి కాటేదాన్‌ వరకు, మహేశ్వరం నుంచి చేవెళ్ల వరకు విస్తరించిన పారిశ్రామిక ప్రాంతాల్లో వేలాది పరిశ్రమలు ఉన్నాయని తెలిపారు. వీటితోపాటు సాఫ్ట్‌వేర్‌ సంస్థలు, అంతర్జాతీయ విమానాశ్రయం, ఫ్యూచర్‌ సిటీ నిర్మాణ పనుల్లోనూ పెద్ద సంఖ్యలో ఉద్యోగులు, కార్మికులు పనిచేస్తున్నారని పేర్కొన్నారు.

ఈ ప్రాంతంలో తగిన ఈఎస్ఐ ఆసుపత్రి అందుబాటులో లేకపోవడంతో అనారోగ్య సమస్యలు తలెత్తినప్పుడు కార్మికులు సనత్‌నగర్‌, నాచారం ప్రాంతాల్లోని ఆసుపత్రులకు వెళ్లాల్సి వస్తోందని ఆయన అన్నారు. చికిత్స కోసం దూరప్రాంతాలకు వెళ్లడం వల్ల ప్రయాణ సమయం, ఖర్చులతోపాటు ఒకరోజు వేతనం కోల్పోవాల్సిన పరిస్థితి ఏర్పడుతోందని వివరించారు.

హైదరాబాద్‌కు సమీపంలో ఉన్న రంగారెడ్డి జిల్లా పారిశ్రామికంగా, పట్టణీకరణ పరంగా వేగంగా అభివృద్ధి చెందుతున్న నేపథ్యంలో కార్మికులకు మెరుగైన వైద్య సేవలు అందించేందుకు ప్రత్యేక ఆసుపత్రి అవసరమని పర్వతాలు పేర్కొన్నారు.

ఆసుపత్రి మంజూరయ్యే వరకు ఉద్యమం

రంగారెడ్డి జిల్లాకు ఈఎస్ఐ మల్టీ సూపర్‌ స్పెషాలిటీ ఆసుపత్రి మంజూరయ్యే వరకు కార్మికుల తరఫున ఏఐటీయూసీ పోరాటం కొనసాగిస్తుందని పానుగంటి పర్వతాలు స్పష్టం చేశారు. ఇతర కార్మిక సంఘాలను కలుపుకొని భవిష్యత్తులో విస్తృత ఉద్యమాన్ని చేపడతామని తెలిపారు.

గతంలోనూ అధికారులకు వినతులు

ఏఐటీయూసీ జిల్లా ప్రధాన కార్యదర్శి దత్తు నాయక్‌ మాట్లాడుతూ, రంగారెడ్డి జిల్లాలో ఈఎస్ఐ ఆసుపత్రి నిర్మాణం కోసం గతంలో పలుమార్లు జిల్లా కలెక్టర్‌తోపాటు ఇతర ఉన్నతాధికారులను కలిసి విజ్ఞప్తులు చేసినట్లు తెలిపారు. అయినప్పటికీ సమస్య పరిష్కారం కాకపోవడం బాధాకరమన్నారు.

కార్మికుల శ్రమతో పరిశ్రమలు, ప్రభుత్వాలకు భారీ ఆదాయం సమకూరుతున్నప్పటికీ, వారి మెరుగైన వైద్యం కోసం అవసరమైన ఆసుపత్రిని మంజూరు చేయకపోవడం విచారకరమని పేర్కొన్నారు. ప్రభుత్వం, సంబంధిత అధికారులు స్పందించి వెంటనే ఆసుపత్రి మంజూరుకు చర్యలు తీసుకోవాలని కోరారు.

డిమాండ్‌ను పరిష్కరించకపోతే జిల్లా వ్యాప్తంగా ఆందోళనలు, పోరాటాలు నిర్వహిస్తామని ఏఐటీయూసీ నాయకులు హెచ్చరించారు.