మాదకద్రవ్యాల నిర్మూలనపై యువతకు అవగాహన
- కనిగిరిలో నషా ముక్త్‌ యువ భారత్‌ కార్యక్రమం
- యువతతో ప్రతిజ్ఞ చేయించిన గుడ్‌ హెల్ప్‌ ఫౌండేషన్‌ డైరెక్టర్‌ మండ్రు రమేష్‌బాబు
కనిగిరి | ఎన్ టుడే న్యూస్‌:
నషా ముక్త్‌ యువ భారత్‌ అభియాన్‌ 100 వారాల కార్యాచరణ ప్రణాళికలో భాగంగా 11వ ఆదివారం కనిగిరి పట్టణంలోని టాకరిపాలెంలో ప్రజలకు, యువతకు మాదకద్రవ్యాల నిర్మూలనపై అవగాహన కార్యక్రమం నిర్వహించారు. మండల న్యాయ సేవాధికార సంస్థ, గుడ్‌ హెల్ప్‌ ఫౌండేషన్‌ సంయుక్త ఆధ్వర్యంలో ఈ కార్యక్రమం జరిగింది.
ఈ సందర్భంగా గుడ్‌ హెల్ప్‌ ఫౌండేషన్‌ డైరెక్టర్‌, పారా లీగల్‌ వాలంటీర్‌ మండ్రు రమేష్‌బాబు యువతకు మాదకద్రవ్యాల వినియోగం వల్ల కలిగే అనర్థాలను వివరించారు. మాదకద్రవ్యాల అలవాటు వ్యక్తిగత ఆరోగ్యంతో పాటు కుటుంబ జీవితం, సామాజిక సంబంధాలపై ప్రతికూల ప్రభావం చూపుతుందని తెలిపారు. యువత వాటికి దూరంగా ఉంటూ ఆరోగ్యకరమైన జీవనశైలిని అలవర్చుకోవాలని సూచించారు.
అనంతరం పాల్గొన్న యువతతో నషా ముక్త్‌ యువ భారత్‌ ప్రతిజ్ఞ చేయించారు. మాదకద్రవ్యాల రహిత సమాజ నిర్మాణానికి ప్రతి ఒక్కరూ తమ వంతు కృషి చేయాలని పిలుపునిచ్చారు.
ఈ కార్యక్రమంలో స్థానిక ప్రజలు, యువత, గుడ్‌ హెల్ప్‌ ఫౌండేషన్‌ ప్రతినిధులు, న్యాయ సేవాధికార సంస్థ సిబ్బంది తదితరులు పాల్గొన్నారు.
