వెంకట్రావుపేటలో ఘనంగా బతుకమ్మ వేడుకలు
వేపాల్ భక్త మండలి ఆధ్వర్యంలో భక్తిశ్రద్ధలతో సంబరాలు
వెంకట్రావుపేట (ఎన్ టుడే న్యూస్): తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను వెంకట్రావుపేట గ్రామంలో వేపాల్ భక్త మండలి ఆధ్వర్యంలో భక్తిశ్రద్ధలతో, ఉత్సాహంగా నిర్వహించారు.
ఈ సందర్భంగా మహిళలు రంగురంగుల పూలతో అందంగా బతుకమ్మలను పేర్చి, సంప్రదాయ దుస్తులు ధరించి వేడుకల్లో పాల్గొన్నారు. బతుకమ్మ పాటలు పాడుతూ, ఆటపాటలతో సందడి చేశారు. మహిళలు, యువతులు పెద్ద సంఖ్యలో పాల్గొనడంతో గ్రామంలో పండుగ వాతావరణం నెలకొంది.
తెలంగాణ ఆడపడుచుల ఆత్మీయతకు, ప్రకృతిపై ప్రేమకు, మన సంస్కృతి సంప్రదాయాల గొప్పతనానికి బతుకమ్మ పండుగ ప్రతీకగా నిలుస్తుందని గ్రామస్తులు తెలిపారు. ప్రతి ఒక్కరూ ఐకమత్యంతో పండుగను జరుపుకోవడం ఆనందదాయకమని పేర్కొన్నారు.
మన సంస్కృతి, సంప్రదాయాలను భావితరాలకు అందించడంతో పాటు, గ్రామ ప్రజలందరికీ సుఖసంతోషాలు, ఆయురారోగ్యాలు కలగాలని, పాడిపంటలతో గ్రామం సుభిక్షంగా ఉండాలని గౌరమ్మను ప్రార్థించారు.
