పండుగ వేళ బ్యాంక్ ఆఫ్ బరోడా బంపర్ ఆఫర్లు.. గృహ, వాహన రుణాలపై వడ్డీ రాయితీలు
- పండుగ ఆఫర్లు ప్రకటించిన బ్యాంక్ ఆఫ్ బరోడా
- గృహ రుణాల వడ్డీ 7.40 శాతం నుంచి.. కార్ల రుణాలు 7.85 శాతం నుంచి
ముంబై (ఎన్‌ టుడే న్యూస్‌): పండుగ సీజన్‌ను పురస్కరించుకుని ప్రభుత్వ రంగ బ్యాంక్ ఆఫ్ బరోడా ఖాతాదారుల కోసం ప్రత్యేక ఆఫర్లను ప్రకటించింది. ‘బాబ్ కే సంగ్ త్యోహార్ కీ ఉమంగ్’ పేరుతో అందిస్తున్న ఈ ఆఫర్లలో గృహ రుణాలు, కార్ల రుణాలపై ఆకర్షణీయమైన వడ్డీ రేట్లతో పాటు ప్రాసెసింగ్ ఫీజు మినహాయింపులు, ఇతర ప్రయోజనాలను కల్పిస్తోంది.
ఈ పథకం కింద గృహ రుణాల వడ్డీ రేటు 7.40 శాతం నుంచి, కార్ల రుణాల వడ్డీ రేటు 7.85 శాతం నుంచి ప్రారంభమవుతున్నట్లు బ్యాంక్ వెల్లడించింది. సొంతింటి కలను నెరవేర్చుకోవాలనుకునే వారు, కొత్త వాహనం కొనుగోలు చేయాలనుకునే వారికి ఈ ఆఫర్లు ఉపయోగపడనున్నాయి.
మహిళా రుణగ్రహీతలు, అర్హులైన ఉద్యోగులకు ప్రత్యేక వడ్డీ రాయితీలు అందించనున్నట్లు బ్యాంక్ తెలిపింది. గృహ రుణాల ప్రాసెసింగ్ ఫీజు మినహాయింపు ద్వారా రుణగ్రహీతల ప్రారంభ ఖర్చులను తగ్గించే అవకాశం కల్పిస్తోంది. అయితే రుణాలపై వర్తించే వడ్డీ రేట్లు, రాయితీలు కస్టమర్ అర్హతలు, బ్యాంక్ నిబంధనల ఆధారంగా మారవచ్చు.
గృహ, కార్ల రుణాలతో పాటు సూక్ష్మ, చిన్న, మధ్యతరహా పరిశ్రమల (ఎంఎస్ఎంఈ) రంగానికి కూడా ప్రత్యేక రుణ సదుపాయాలను అందిస్తోంది. ఎలక్ట్రిక్ వాహనాల కొనుగోలును ప్రోత్సహించేందుకు ప్రత్యేక రుణ పథకాలు, అర్హులైన ఖాతాదారులకు అదనపు ప్రయోజనాలను కల్పిస్తున్నట్లు బ్యాంక్ పేర్కొంది. పొదుపు ఖాతాదారుల కోసం కూడా వివిధ పథకాలు, సేవలను అందుబాటులో ఉంచింది.
ఈ సందర్భంగా బ్యాంక్ ఆఫ్ బరోడా ఎగ్జిక్యూటివ్ డైరెక్టర్ బీనా వహీద్ మాట్లాడుతూ, పండుగ సీజన్‌లో వినియోగదారుల అవసరాలకు అనుగుణంగా వివిధ బ్యాంకింగ్ సేవలపై ప్రత్యేక ప్రయోజనాలను అందిస్తున్నట్లు తెలిపారు. గృహ, వాహన రుణాల నుంచి వ్యాపార రుణాలు, పొదుపు పథకాల వరకు పలు విభాగాల్లో ఖాతాదారులకు ప్రయోజనం చేకూర్చడమే లక్ష్యమని పేర్కొన్నారు.
పండుగల సమయంలో ఇల్లు లేదా వాహనం కొనుగోలు చేయాలనుకునేవారు ఈ ఆఫర్లను పరిశీలించవచ్చు. రుణం తీసుకునే ముందు వడ్డీ రేటు, నెలవారీ వాయిదా (ఈఎంఐ), రుణ కాలపరిమితి, ప్రాసెసింగ్ ఫీజు, ఇతర ఛార్జీలు, అర్హతలకు సంబంధించిన పూర్తి వివరాలను బ్యాంకును సంప్రదించి తెలుసుకోవాలని నిపుణులు సూచిస్తున్నారు.
