పోలవరం టీడీపీ ఎంపీటీసీ అభ్యర్థిగా చల్లగుళ్ల రాజ్యలక్ష్మి

ఏలూరు జిల్లా, నూజివీడు నియోజకవర్గం, చాట్రాయి మండలం పోలవరం ఎంపీటీసీ ఎన్నికల్లో తెలుగుదేశం పార్టీ అభ్యర్థిగా చల్లగుళ్ల రాజ్యలక్ష్మిని ఎంపిక చేశారు. ఈ మేరకు పోలవరం టీడీపీ అధ్యక్షుడు బిలుగుది జయరాజు అధ్యక్షతన గ్రామంలోని హైస్కూల్ సెంటర్‌లో సమావేశం నిర్వహించారు. ఈ సమావేశానికి టీడీపీ నాయకులు, కార్యకర్తలు, కూటమి శ్రేణులు పెద్ద సంఖ్యలో హాజరయ్యారు. చల్లగుళ్ల రాజ్యలక్ష్మి అభ్యర్థిత్వాన్ని సమావేశంలో పాల్గొన్న నాయకులు, కార్యకర్తలు ఏకగ్రీవంగా ఆమోదించారు. ఈ సందర్భంగా చాట్రాయి టీడీపీ మాజీ మండల పార్టీ అధ్యక్షుడు మరిడి వెంకటేశ్వరరావు (చిట్టిబాబు) మాట్లాడుతూ, పార్టీలోని విభేదాలను పక్కనపెట్టి అందరూ ఏకతాటిపైకి వచ్చి గెలుపే లక్ష్యంగా పనిచేయాలని పిలుపునిచ్చారు. పోలవరం ఎంపీటీసీగా చల్లగుళ్ల రాజ్యలక్ష్మి గెలుపు ఆవశ్యకమని పేర్కొన్నారు. నాయకులు, కార్యకర్తలు సమన్వయంతో కృషి చేసి ఆమెను గెలిపించాలని కోరారు. అందరూ కలిసికట్టుగా పనిచేస్తే విజయం సాధిస్తామని ధీమా వ్యక్తం చేశారు.