చాట్రాయిలో కూటమి అభ్యర్థి సవరం రామలక్ష్మి విస్తృత ప్రచారం

జనసేన, టీడీపీ, బీజేపీ నాయకుల భాగస్వామ్యం

 ఏలూరు జిల్లా, నూజివీడు నియోజకవర్గం, చాట్రాయి మండల కేంద్రంలో స్థానిక సంస్థల ఎన్నికల ప్రచారం ఊపందుకుంది. చాట్రాయిలో కూటమి అభ్యర్థిగా జనసేన పార్టీ తరఫున ఎంపీటీసీ స్థానానికి పోటీ చేస్తున్న సవరం రామలక్ష్మికి మద్దతుగా ఆదివారం ఎన్నికల ప్రచారం నిర్వహించారు. ఈ ప్రచార కార్యక్రమంలో చాట్రాయి మండల జనసేన నాయకుడు, కృష్ణారావుపాలెం మాజీ ఎంపీటీసీ చింతగుంట్ల వెంకటేశ్వరరావు గౌడ్ పాల్గొని అభ్యర్థికి మద్దతుగా ప్రచారం చేశారు. జనసేన, తెలుగుదేశం, భారతీయ జనతా పార్టీ నాయకులు సమన్వయంతో ప్రచారంలో పాల్గొనడం కూటమి శ్రేణుల్లో ఉత్సాహాన్ని నింపింది. ఇంటింటికీ వెళ్లి ప్రజలను కలుసుకుంటూ అభ్యర్థికి మద్దతు ఇవ్వాలని కోరారు. ఈ సందర్భంగా జనసేన నాయకులు తుమ్మల జగన్, సవరం రామారావుతో పాటు టీడీపీ, బీజేపీ నాయకులు, కార్యకర్తలు పాల్గొన్నారు.