ఐఆర్‌సీఏ పునరావాస కేంద్రంలో బాధితులకు కౌన్సెలింగ్ ఇచ్చిన కౌన్సిలర్ కోనేటి ఎల్లయ్య
- మత్తు పదార్థాల వ్యసనం నుంచి బయటపడాలని సూచన
- ఆత్మవిశ్వాసంతో కొత్త జీవితాన్ని ప్రారంభించాలని పిలుపు
- వ్యసనం నుంచి బయటపడి కొత్త జీవితం ప్రారంభించాలి
- ఆత్మవిశ్వాసంతో ముందుకు సాగాలి
చిట్యాల | ఎన్ టుడే న్యూస్: చిట్యాల మున్సిపాలిటీలోని నాలుగో వార్డులో ఉన్న ఐఆర్‌సీఏ (IRCA) ఇంటిగ్రేటెడ్ రిహాబిలిటేషన్ సెంటర్‌ను నాలుగో వార్డు కౌన్సిలర్ కోనేటి ఎల్లయ్య సందర్శించారు. ఈ సందర్భంగా మద్యం, గంజాయి, ఇతర మత్తు పదార్థాల వ్యసనానికి చికిత్స పొందుతున్న బాధితులతో మాట్లాడి వారికి ధైర్యం చెప్పారు.
ఈ సందర్భంగా కోనేటి ఎల్లయ్య మాట్లాడుతూ మత్తు పదార్థాలకు బానిసలై జీవితాలను ఇబ్బందుల్లోకి నెట్టుకోవద్దని సూచించారు. పునరావాస కేంద్రంలో పూర్తిస్థాయిలో చికిత్స పొందడంతో పాటు అవసరమైన కౌన్సెలింగ్ తీసుకోవాలని కోరారు. చికిత్స అనంతరం మంచి మార్పుతో కొత్త జీవితాన్ని ప్రారంభించి, కుటుంబ సభ్యులతో సంతోషంగా జీవిస్తూ సమాజంలో గౌరవంగా ఉండాలని అన్నారు.
మత్తు పదార్థాల వ్యసనం నుంచి బయటపడేందుకు ఆత్మవిశ్వాసంతో ముందుకు సాగాలని, వైద్యులు, కౌన్సెలర్లు ఇచ్చే సూచనలను పాటించాలని కోనేటి ఎల్లయ్య తెలిపారు. ప్రతి ఒక్కరూ తమ జీవితాలను చక్కదిద్దుకుని భవిష్యత్తులో మంచి స్థాయికి చేరుకోవాలని ఆకాంక్షించారు.
ఈ కార్యక్రమంలో డాక్టర్ కోమలి కృష్ణారెడ్డి, సైకాలజిస్ట్ గురువయ్య, కోఆర్డినేటర్ పవన్, భరత్ తేజ, సాధికానా చైర్మన్ ఫరీద్ తదితరులు పాల్గొన్నారు.
