స్థానిక సంస్థల ఎన్నికల్లో పోటీకి సీపీఐ ఎంఎల్‌ లిబరేషన్‌ సన్నద్ధం
ఉత్తరాంధ్ర, కోస్తా, రాయలసీమ జిల్లాల్లో అభ్యర్థుల బరిలోకి దింపేందుకు ఏర్పాట్లు
స్థానిక సంస్థల ఎన్నికల్లో జిల్లా పరిషత్, మండల పరిషత్, గ్రామ పంచాయతీల స్థానాల్లో తమ అభ్యర్థులను పోటీకి సిద్ధం చేస్తున్నట్లు సీపీఐ ఎంఎల్‌ లిబరేషన్‌ రాష్ట్ర కార్యవర్గ సభ్యుడు డి. హరినాథ్‌ తెలిపారు. రాష్ట్రంలోని ఉత్తరాంధ్ర, కోస్తా, రాయలసీమ ప్రాంతాల్లో పార్టీ బలంగా ఉన్న జిల్లాలపై దృష్టి సారించి అభ్యర్థులను రంగంలోకి దింపేందుకు సన్నాహాలు చేస్తున్నట్లు వెల్లడించారు.
రాష్ట్రంలో స్థానిక సంస్థలను నిర్వీర్యం చేశారని, వాటికి కేటాయించిన నిధులను సైతం పక్కదారి పట్టించారని హరినాథ్‌ విమర్శించారు. గ్రామీణ ప్రాంతాల్లో రహదారులు అధ్వానంగా ఉన్నాయని, పారిశుద్ధ్య నిర్వహణ అస్తవ్యస్తంగా మారిందని ఆరోపించారు. విద్య, వైద్య సౌకర్యాల్లో ఆశించిన పురోగతి లేదని, కొన్ని ప్రాంతాల్లో ప్రాథమిక పాఠశాలలు మూతపడుతున్నాయని పేర్కొన్నారు. గ్రామీణ ప్రజలకు ఇళ్లు, ఇంటి స్థలాలు రెండు సెంట్ల చొప్పున ఇస్తామన్న ప్రకటనలు ఆచరణలోకి రాలేదని విమర్శించారు.
వ్యవసాయ కార్మికులకు జీవనోపాధి కల్పించే మహాత్మా గాంధీ జాతీయ గ్రామీణ ఉపాధి హామీ చట్టం పేరును మార్చడంతో పాటు, దాని అమలు తీరును పథకానికి పరిమితం చేసి నిధుల్లో కోత విధించారని హరినాథ్‌ ఆరోపించారు. ఎల్‌నినో పరిస్థితుల ప్రభావంతో పంటలు దెబ్బతిన్నాయని, లక్షల ఎకరాల భూములు సాగుకు దూరమై రైతులు, వ్యవసాయ కార్మికులు తీవ్ర సంక్షోభాన్ని ఎదుర్కొంటున్నారని అన్నారు.
వ్యవసాయ సంక్షోభంతో ఇబ్బందులు పడుతున్న రైతులు, వ్యవసాయ కార్మికులకు ఉపాధి కల్పించే ప్రత్యేక పథకాలను రూపొందించాలని ఆయన ప్రభుత్వాన్ని కోరారు. తక్షణ సాయంగా నిత్యావసర వస్తువులను ఉచితంగా పంపిణీ చేయాలని, రైతుల రుణాలను రద్దు చేయాలని, పశువులకు అవసరమైన పశుగ్రాసాన్ని అందించాలని డిమాండ్‌ చేశారు.
స్థానిక ఎన్నికల్లో ప్రజా సమస్యల పరిష్కారం కోసం పనిచేసే నాయకులను ఎన్నుకోవాలని, డబ్బులకు ప్రలోభపడకుండా ఓటు హక్కును వినియోగించుకోవాలని హరినాథ్‌ ఓటర్లకు విజ్ఞప్తి చేశారు. సీపీఐ ఎంఎల్‌ లిబరేషన్‌ పార్టీ గుర్తు మూడు నక్షత్రాల జెండాపై ఓటు వేసి తమ అభ్యర్థులను గెలిపించాలని కోరారు.
