గుత్తికొండ గ్రామంలోకి వచ్చిన మొసలి.. సురక్షితంగా పట్టుకున్న అటవీశాఖ సిబ్బంది

• గ్రామస్తుల సహకారంతో మొసలిని బంధించిన అధికారులు
  
• గోవిందాపురం సమీపంలోని కృష్ణా నదిలో విడిచిపెట్టిన వైనం
  
• ఆపరేషన్‌లో పాల్గొన్న సిబ్బంది

పిడుగురాళ్ల, అక్టోబర్ 21 | ఎన్ టుడే న్యూస్: పల్నాడు జిల్లా పిడుగురాళ్ల మండలం గుత్తికొండ గ్రామంలో బుధవారం తెల్లవారుజామున సుమారు 3 గంటల సమయంలో మొసలి కనిపించడంతో గ్రామస్తులు అప్రమత్తమయ్యారు. గ్రామంలోకి మొసలి వచ్చిన విషయాన్ని స్థానికులు అటవీశాఖ అధికారులకు సమాచారం అందించారు.

సమాచారం అందుకున్న అటవీశాఖ సిబ్బంది, స్ట్రైకింగ్ ఫోర్స్ బృందం వెంటనే గ్రామానికి చేరుకున్నారు. గ్రామస్తుల సహకారంతో మొసలిని సురక్షితంగా పట్టుకున్నారు. అనంతరం దానిని ఆటోల్లో తరలించి గోవిందాపురం సమీపంలోని కృష్ణా నదిలో విడిచిపెట్టారు.

ఈ కార్యక్రమంలో పిడుగురాళ్ల రేంజ్ ఫారెస్ట్ బీట్ ఆఫీసర్ ఎం. శ్యాం కుమార్‌తో పాటు స్ట్రైకింగ్ ఫోర్స్ సిబ్బంది షేక్ గుత్తికొండ జానీ భాష, గంధం వెంకటేశ్వరరావు, ఆవుల వెంకటయ్య పాల్గొన్నారు.

అటవీశాఖ సిబ్బంది సత్వరమే స్పందించి మొసలిని సురక్షితంగా తరలించడంతో గ్రామస్తులు ఊపిరి పీల్చుకున్నారు.