మధ్యప్రాచ్య ఉద్రిక్తతలతో క్రూడాయిల్ ధరలకు రెక్కలు.. బ్రెంట్ బ్యారెల్ $112.77
ఎన్‌ టుడే న్యూస్‌: అంతర్జాతీయ మార్కెట్‌లో క్రూడాయిల్ ధరలు భారీగా పెరిగాయి. సౌదీ అరేబియాపై హౌతీల దాడులు, ఇరాన్‌పై మరోసారి దాడులు జరిగే అవకాశం ఉందన్న వార్తల నేపథ్యంలో మధ్యప్రాచ్యంలో ఉద్రిక్తతలు పెరిగాయి. దీంతో అంతర్జాతీయ మార్కెట్‌లో ముడి చమురు ధరలు ఒక్కసారిగా ఎగిశాయి.
బ్రెంట్ క్రూడ్ బ్యారెల్ ధర 112.77 డాలర్లకు చేరింది. ఒక్క ట్రేడింగ్ సెషన్‌లోనే 4 డాలర్లు, అంటే 3.68 శాతం పెరిగింది. మరోవైపు వెస్ట్ టెక్సాస్ ఇంటర్మీడియట్ (WTI) క్రూడ్ ధర సుమారు 2 శాతం పెరిగి బ్యారెల్‌కు 99 డాలర్ల వద్ద ట్రేడవుతోంది.
మధ్యప్రాచ్యంలో ఉద్రిక్తతలు మరింత పెరిగితే చమురు సరఫరాపై ప్రభావం పడవచ్చన్న ఆందోళనలు ధరల పెరుగుదలకు కారణమవుతున్నాయి. ముడి చమురు ధరల పెరుగుదల కొనసాగితే భారత్ వంటి చమురు దిగుమతులపై ఆధారపడే దేశాలపై ఇంధన దిగుమతి వ్యయం, ద్రవ్యోల్బణం పరంగా ప్రభావం పడే అవకాశం ఉంది.
