బంగాళాఖాతంలో వాయుగుండం.. ఏపీ తీరానికి తుపాను ముప్పు

ప్రజలు అత్యంత అప్రమత్తంగా ఉండాలి 

బంగాళాఖాతంలో ఏర్పడిన వాయుగుండం క్రమంగా బలపడుతోంది. గడిచిన ఆరు గంటల్లో గంటకు 5 కిలోమీటర్ల వేగంతో కదులుతున్న ఈ వాయుగుండం ప్రస్తుతం విశాఖపట్నానికి 880 కిలోమీటర్లు, కాకినాడకు 980 కిలోమీటర్లు, మచిలీపట్నానికి 1,080 కిలోమీటర్లు, బాపట్లకు 1,150 కిలోమీటర్ల దూరంలో కేంద్రీకృతమై ఉంది. వాతావరణ పరిస్థితుల నేపథ్యంలో ఈ వాయుగుండం ఆదివారం తీవ్ర వాయుగుండంగా, సోమవారం తుపానుగా మారే అవకాశం ఉందని అంచనా వేస్తున్నారు. మంగళవారం ఉదయానికి పశ్చిమ మధ్య బంగాళాఖాతంలో తీవ్ర తుపానుగా బలపడే అవకాశముంది. అనంతరం బుధవారం మధ్యాహ్నానికి అతి తీవ్ర తుపానుగా మారి బాపట్ల–విశాఖపట్నం మధ్య తీరం దాటే అవకాశం ఉందని విపత్తుల నిర్వహణ సంస్థ వెల్లడించింది. తుపాను ముప్పు నేపథ్యంలో తీర ప్రాంత ప్రజలు అప్రమత్తంగా ఉండాలని రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ సూచించారు. అధికారిక హెచ్చరికలను ఎప్పటికప్పుడు గమనించాలని, విపత్తుల నిర్వహణ శాఖ సూచించే ముందస్తు జాగ్రత్తలను పాటించాలని కోరారు.