విజయవాడలో పోలింగ్‌ కేంద్రాలను పరిశీలించిన డీసీపీ గుణ్ణం రామకృష్ణ
- ఎన్నికల భద్రతా ఏర్పాట్లపై పోలీసు అధికారులకు సూచనలు
- సమస్యాత్మక కేంద్రాల వద్ద సీసీటీవీలు, బారికేడ్లు ఏర్పాటు చేయాలని ఆదేశం
- సమస్యాత్మక కేంద్రాలపై ప్రత్యేక దృష్టి
విజయవాడ, ఎన్టీఆర్ జిల్లా | ఎన్ టుడే న్యూస్‌:
విజయవాడ నగరంలో మున్సిపల్‌ కార్పొరేషన్‌ ఎన్నికల నేపథ్యంలో పోలింగ్‌ కేంద్రాల్లో భద్రతా ఏర్పాట్లను డీసీపీ గుణ్ణం రామకృష్ణ పరిశీలించారు. కొత్తపేట పోలీస్‌స్టేషన్‌ సీఐ కొండలరావు, స్టేషన్‌ ఎస్‌ఐలతో కలిసి సంబంధిత పోలింగ్‌ కేంద్రాలను సందర్శించారు.
ఈ సందర్భంగా పోలింగ్‌ కేంద్రాల వద్ద భద్రతా ఏర్పాట్లు, ఓటర్ల రాకపోకలకు సంబంధించిన పరిస్థితులు, సమస్యాత్మక ప్రాంతాల గుర్తింపు తదితర అంశాలను పరిశీలించారు. ఎన్నికల సమయంలో ఎలాంటి అవాంఛనీయ సంఘటనలు చోటుచేసుకోకుండా ముందస్తు చర్యలు తీసుకోవాలని, బందోబస్తు విధులను అప్రమత్తంగా నిర్వహించాలని పోలీసు అధికారులకు సూచించారు.
అవసరమైన పోలింగ్‌ కేంద్రాల వద్ద బారికేడ్లు ఏర్పాటు చేయాలని, సమస్యాత్మక కేంద్రాల్లో సీసీటీవీ కెమెరాల ఏర్పాటుకు చర్యలు తీసుకోవాలని డీసీపీ సూచించారు. ఓటర్లు ఎలాంటి భయాందోళనలకు గురికాకుండా స్వేచ్ఛగా తమ ఓటు హక్కును వినియోగించుకునేలా తగిన భద్రత కల్పించాలని అధికారులను ఆదేశించారు.
ఎన్నికల నియమావళిని ఉల్లంఘించే వారిపై చట్టప్రకారం చర్యలు తీసుకుంటామని తెలిపారు. ఎన్నికల ప్రక్రియ ప్రశాంతంగా, పారదర్శకంగా జరిగేందుకు పోలీస్‌ శాఖకు ప్రజలు సహకరించాలని విజ్ఞప్తి చేశారు.
