పోస్టల్ ఉద్యోగులకు దీపావళి కానుక.. 60 రోజుల వేతనానికి సమానమైన బోనస్

భారత పోస్టల్ శాఖ ఉద్యోగులకు కేంద్ర ప్రభుత్వం బోనస్ ప్రకటించింది. 2025–26 ఆర్థిక సంవత్సరానికి సంబంధించి 60 రోజుల వేతనానికి సమానమైన ఉత్పాదకత ఆధారిత బోనస్‌ (ప్రొడక్టివిటీ లింక్డ్ బోనస్) అందించనున్నట్లు ప్రకటించింది. ఈ నిర్ణయంతో దేశవ్యాప్తంగా పోస్టల్ శాఖలో పనిచేస్తున్న మల్టీ టాస్కింగ్ స్టాఫ్, గ్రూప్‌-సి, నాన్‌ గెజిటెడ్‌ గ్రూప్‌-బి ఉద్యోగులతో పాటు గ్రామీణ డాక్‌ సేవకులు, పూర్తికాలిక తాత్కాలిక కార్మికులకు ప్రయోజనం చేకూరనుంది. అర్హత కలిగిన ఉద్యోగులకు గరిష్ఠంగా రూ.13,816 వరకు బోనస్‌ అందనుంది. పండుగల సమయంలో ఈ మొత్తం ఉద్యోగుల కుటుంబాలకు ఆర్థికంగా కొంత ఊరటనివ్వనుంది.