చాట్రాయి జడ్పీటీసీ అభ్యర్థిగా దుర్గం పుల్లారావు నామినేషన్
ఏలూరు జిల్లా, చాట్రాయి: చాట్రాయి జడ్పీటీసీ స్థానానికి సీపీఐ(ఎంఎల్) లిబరేషన్ అభ్యర్థిగా దుర్గం పుల్లారావు, చాట్ల బాబురావు నామినేషన్ దాఖలు చేశారు. ఈ సందర్భంగా ఆ పార్టీ రాష్ట్ర కార్యవర్గ సభ్యుడు డి. హరినాథ్ రాష్ట్ర ప్రభుత్వంపై విమర్శలు చేశారు. స్థానిక సంస్థల ఎన్నికల ప్రక్రియలో ప్రభుత్వం అణిచివేత ధోరణిని కొనసాగిస్తోందని ఆరోపించారు. ఎన్నికలు స్వేచ్ఛగా, నిష్పక్షపాతంగా జరుగుతాయా లేదా అనే అనుమానాలు వ్యక్తమవుతున్నాయని పేర్కొన్నారు.
మున్సిపల్ ఎన్నికలపై సుప్రీంకోర్టు వాయిదా నిర్ణయం తీసుకున్నప్పటికీ ప్రభుత్వం, అధికారుల వైఖరిలో మార్పు కనిపించడం లేదని హరినాథ్ విమర్శించారు. ఎన్నికల ఓటరు జాబితాలు సైతం గందరగోళానికి కారణమవుతున్నాయని అన్నారు. చాట్రాయి మండల ఎన్నికల అధికారి వద్ద ఉన్న ఓటరు జాబితాకు, జిల్లా పరిషత్ కార్యాలయంలో అందుబాటులో ఉన్న ఓటరు జాబితాకు మధ్య పొంతన లేకుండా పోయిందని తెలిపారు. ఈ విషయాన్ని ఎన్నికల రిటర్నింగ్ అధికారి దృష్టికి తీసుకెళ్లిన అనంతరం, జిల్లా పరిషత్ కార్యాలయంలోని ఓటరు జాబితాలో పేర్లు, ఓటరు సంఖ్యలను గంటకు పైగా పరిశీలించి ధ్రువీకరించిన తర్వాతే నామినేషన్ పత్రాలను ఆమోదించారని వివరించారు.
ఎన్నికల ప్రక్రియలో ఓటరు జాబితాల మధ్య సమన్వయం లేకపోవడం ప్రభుత్వ వైఫల్యాన్ని తెలియజేస్తోందని ఆయన ఆరోపించారు. ఎన్నికలు పారదర్శకంగా నిర్వహించేందుకు అధికారులు అవసరమైన చర్యలు తీసుకోవాలని కోరారు.
ఈ కార్యక్రమంలో ఉన్నం అనిల్, నల్ల శీను, సుందరం, కలపాల వెంకటేశ్వరరావు, తిరుపతిరావు, నందిపాం ఏసు, హెచ్. రాజేంద్ర ప్రసాద్, నందిపాం కిషోర్ తదితరులు పాల్గొన్నారు.
