ఆంధ్ర–తెలంగాణ సరిహద్దు చెక్‌పోస్ట్ వద్ద విస్తృత తనిఖీలు
అక్రమ మద్యం, నగదు రవాణాపై పోలీసుల నిఘా.. నిబంధనలు ఉల్లంఘిస్తే చర్యలు తప్పవు: ఎస్సై క్రాంతి కుమార్
ఏలూరు జిల్లా, జీలుగుమిల్లి: ఎన్నికల నేపథ్యంలో అక్రమ మద్యం, నగదు రవాణాను అరికట్టేందుకు ఆంధ్ర–తెలంగాణ సరిహద్దు ప్రాంతాల్లో పోలీసులు, ఎక్సైజ్ శాఖ అధికారులు నిఘా ముమ్మరం చేశారు. జీలుగుమిల్లి మండలం తాటియాకులగూడెం వద్ద ఏర్పాటు చేసిన సరిహద్దు చెక్‌పోస్ట్‌లో పోలీసులు, ఎక్సైజ్ శాఖ సిబ్బంది తనిఖీలు నిర్వహించారు. జీలుగుమిల్లి ఎస్సై వి. క్రాంతి కుమార్ ఆధ్వర్యంలో చేపట్టిన ఈ తనిఖీల్లో తెలంగాణ నుంచి ఆంధ్రప్రదేశ్‌లోకి అక్రమంగా మద్యం తరలించే అవకాశాలను అడ్డుకోవడంతో పాటు, ఎన్నికల కోడ్ నిబంధనలకు విరుద్ధంగా నగదు రవాణా జరగకుండా అధికారులు అప్రమత్తంగా వ్యవహరించారు. సరిహద్దు మీదుగా రాకపోకలు సాగించే వాహనాలను తనిఖీ చేస్తూ అక్రమ రవాణాపై ప్రత్యేక దృష్టి సారించారు.
ఈ సందర్భంగా ఎస్సై వి. క్రాంతి కుమార్ మాట్లాడుతూ ఎన్నికల ప్రవర్తనా నియమావళిని ప్రతి ఒక్కరూ తప్పనిసరిగా పాటించాలని సూచించారు. తెలంగాణ నుంచి ఆంధ్రప్రదేశ్‌లోకి అక్రమంగా మద్యం తరలించినా, ఎన్నికల నిబంధనలకు విరుద్ధంగా నగదు రవాణా చేసినా చట్టప్రకారం చర్యలు తీసుకుంటామని హెచ్చరించారు. ఎన్నికల ప్రక్రియ ప్రశాంతంగా, పారదర్శకంగా జరిగేలా సరిహద్దు ప్రాంతాల్లో నిరంతరం తనిఖీలు కొనసాగిస్తామని స్పష్టం చేశారు. నిబంధనలను ఉల్లంఘించే వారిపై ఎలాంటి ఉపేక్ష లేకుండా చర్యలు తీసుకుంటామని తెలిపారు. ఎన్నికల సమయంలో అక్రమ కార్యకలాపాలకు అడ్డుకట్ట వేయడమే లక్ష్యంగా పోలీసు, ఎక్సైజ్ శాఖలు సమన్వయంతో పనిచేస్తున్నాయని పేర్కొన్నారు.
