ఏకే-47తో కాల్పులు.. ఐపీఎస్‌ అంకితా శర్మకు షోకాజ్‌ నోటీసులు
ఆయుధ పూజ వీడియో వైరల్‌.. భద్రతా నిబంధనల ఉల్లంఘనపై పోలీస్‌ శాఖ ఆగ్రహం
ఛత్తీస్‌గఢ్‌: దసరా సందర్భంగా నిర్వహించిన ఆయుధ పూజ అనంతరం ఏకే-47 తుపాకీతో కాల్పులు జరిపిన మహిళా ఐపీఎస్‌ అధికారి అంకితా శర్మకు ఇబ్బందులు ఎదురయ్యాయి. ఆమె కాల్పులు జరుపుతున్న వీడియో సామాజిక మాధ్యమాల్లో వైరల్‌గా మారడంతో పోలీస్‌ శాఖ స్పందించింది. ఆయుధాల వినియోగంలో భద్రతా నిబంధనలు ఉల్లంఘించారన్న అభ్యంతరాలతో రజ్‌నంద్‌గావ్‌ ఎస్పీ అంకితా శర్మకు షోకాజ్‌ నోటీసులు జారీ చేసింది. ఈ ఘటన పోలీస్‌ శాఖలో చర్చనీయాంశంగా మారింది.
అక్టోబర్‌ 20న పోలీస్‌ లైన్స్‌లో సంప్రదాయబద్ధంగా ఆయుధ పూజ నిర్వహించిన అనంతరం అంకితా శర్మ ఏకే-47తో పలుమార్లు కాల్పులు జరిపారు. ఈ దృశ్యాలను చిత్రీకరించిన వీడియో ఇన్‌స్టాగ్రామ్‌లో వైరల్‌గా మారింది. దీంతో ఆమె చర్యపై భిన్నాభిప్రాయాలు వ్యక్తమయ్యాయి. కొందరు ఆమెకు మద్దతు తెలపగా, మరికొందరు ఆయుధాల వినియోగంలో భద్రతా ప్రమాణాలను పాటించలేదని విమర్శించారు. ఈ వీడియోపై వచ్చిన ప్రతికూల స్పందన పోలీస్‌ శాఖ ప్రతిష్ఠకు భంగం కలిగించేలా ఉందని ఉన్నతాధికారులు ఆందోళన వ్యక్తం చేసినట్లు సమాచారం.
ఆయుధాల వినియోగానికి సంబంధించిన భద్రతా నిబంధనలను ఎందుకు పాటించలేదో వివరణ ఇవ్వాలని అంకితా శర్మను అధికారులు ఆదేశించారు. ఆమె సమాధానం అందిన తర్వాత తన అభిప్రాయాలను నమోదు చేసి పోలీస్‌ ప్రధాన కార్యాలయానికి పంపిస్తానని రజ్‌నంద్‌గావ్‌ రేంజ్‌ ఐజీ అజయ్‌ యాదవ్‌ వెల్లడించారు. అక్కడి నుంచి వచ్చే ఆదేశాల మేరకు తదుపరి చర్యలు తీసుకుంటామని తెలిపారు. దీంతో ఈ వ్యవహారంలో ఉన్నతాధికారుల నిర్ణయంపై ఆసక్తి నెలకొంది.
**ఆయుధ పూజలో కాల్పులు అవసరమా?**
రిటైర్డ్‌ ఐపీఎస్‌ అధికారి ఆర్‌.కే. విజ్‌ ఆయుధ పూజ సందర్భంగా కాల్పులు జరపాల్సిన అవసరం లేదని అభిప్రాయపడ్డారు. ఇలాంటి చర్యల వల్ల ప్రమాదాలు జరిగే అవకాశాలు ఉన్నాయని హెచ్చరించారు. మరోవైపు, ఛత్తీస్‌గఢ్‌లో ఆయుధ పూజ సందర్భంగా ఖాళీ తూటాలతో కాల్పులు జరపడం సంప్రదాయంలో భాగమని ఓ ఐపీఎస్‌ అధికారి పేర్కొన్నట్లు పీటీఐ వార్తా సంస్థ వెల్లడించింది. అయితే, గాల్లోకి కాల్చిన తూటాలు తిరిగి నేలపై పడే సమయంలో సమీపంలోని వ్యక్తులకు గాయాలయ్యే ప్రమాదం ఉందని ఆయన హెచ్చరించినట్లు తెలిపింది.
**ఆయుధ వినియోగంపై మాజీ సైనికాధికారి అభ్యంతరం**
మాజీ సైనికాధికారి కేజే ధిల్లాన్‌ సైతం వీడియోలో కనిపించిన ఆయుధ వినియోగంపై అభ్యంతరం వ్యక్తం చేశారు. తుపాకీని వివిధ దిశల్లో గురిపెట్టడం, వెనుకవైపు ప్రజలు ఉండటం వంటి అంశాలు ప్రమాదకరమని పేర్కొన్నారు. ఆయుధాలను వినియోగించే సమయంలో నిర్దేశిత భద్రతా ప్రమాణాలను తప్పనిసరిగా పాటించాల్సిన అవసరాన్ని ఈ ఘటన మరోసారి తెరపైకి తెచ్చింది.
అయితే, సామాజిక మాధ్యమాల్లో కొందరు అంకితా శర్మకు మద్దతుగా నిలిచారు. ఆయుధ వినియోగంలో ఏవైనా లోపాలు ఉంటే వాటిని సరిదిద్దాలని, ఒక ఘటన ఆధారంగా ఆమె వృత్తిపరమైన సేవలను తక్కువ చేసి చూడకూడదని అభిప్రాయపడ్డారు. ఈ నేపథ్యంలో ఆమెపై తీసుకునే చర్యలతో పాటు, వీడియోలో కనిపించిన భద్రతాపరమైన అంశాలపై కూడా చర్చ కొనసాగుతోంది.
ఇదిలా ఉండగా, అంకితా శర్మతో పాటు అదనపు ఎస్పీ కీర్తన్‌ రాథోడ్‌ కూడా ఏకే-47తో కాల్పులు జరిపినట్లు మరో వీడియో వెలుగులోకి వచ్చింది. రాయ్‌పూర్‌, బిలాస్‌పూర్‌, రాయ్‌గఢ్‌, దుర్గ్‌, కబీర్‌ధామ్‌, బస్తర్‌ జిల్లాల్లోనూ ఆయుధ పూజ అనంతరం పోలీసులు కాల్పులు జరిపిన దృశ్యాలు సామాజిక మాధ్యమాల్లో కనిపించాయి. దీంతో పండుగల సందర్భంగా ఆయుధాల వినియోగం, ఖాళీ తూటాల కాల్పుల భద్రత, పోలీసు సిబ్బంది పాటించాల్సిన నిబంధనల అమలుపై విస్తృత చర్చ మొదలైంది.
