26/11 ముంబై దాడుల భీకరతను రూబియోకు వివరించిన జైశంకర్
- తాజ్ హోటల్‌లో నాటి పరిస్థితులను వివరించిన భద్రతా విభాగం అధిపతి సునీల్ కుద్యాది
- దాడుల్లో ఆరుగురు అమెరికన్లు సహా 166 మంది మృతి
- దాడి నాటి పరిస్థితులను వివరించిన సునీల్ కుద్యాది
- ఆరుగురు అమెరికన్లు సహా 166 మంది మృతి
ముంబై | ఎన్ టుడే న్యూస్: 2008 నవంబర్ 26న ముంబైలో జరిగిన ఉగ్రదాడుల భీకరతను అమెరికా విదేశాంగ మంత్రి మార్కో రూబియోకు భారత విదేశాంగ మంత్రి ఎస్. జైశంకర్ వివరించారు. ముంబై పర్యటనలో భాగంగా మంగళవారం తాజ్ మహల్ ప్యాలెస్ హోటల్‌లోని 26/11 స్మారక స్థలాన్ని సందర్శించిన రూబియో, దాడుల్లో ప్రాణాలు కోల్పోయిన వారికి నివాళులర్పించారు.
దాడులు జరిగిన సమయంలో తాజ్ హోటల్‌లో విధుల్లో ఉన్న భద్రతా విభాగం అధిపతి సునీల్ కుద్యాదిని జైశంకర్.. రూబియోకు పరిచయం చేశారు. అనంతరం కుద్యాది అప్పటి పరిస్థితులను వివరించారు. ఉగ్రవాదులు హోటల్‌లోకి ఎలా ప్రవేశించారు, లోపలికి చేరుకున్న తర్వాత ఏం జరిగింది, దాడి సమయంలో అతిథులు, సిబ్బంది ఎదుర్కొన్న పరిస్థితులను ఆయన తెలియజేశారు.
దాదాపు 60 గంటలపాటు కొనసాగిన ఉగ్రదాడి సమయంలో అతిథులను రక్షించేందుకు హోటల్ సిబ్బంది చేసిన ప్రయత్నాలను కూడా కుద్యాది వివరించారు. ఆపరేషన్ సమయంలో భద్రతా బలగాలకు హోటల్‌లోని మార్గాల గురించి సమాచారం అందించడంలో ఆయన కీలక పాత్ర పోషించారు.
2008 నవంబర్ 26న జరిగిన ముంబై ఉగ్రదాడుల్లో మొత్తం 166 మంది ప్రాణాలు కోల్పోయారు. వారిలో ఆరుగురు అమెరికా పౌరులు కూడా ఉన్నారు. తాజ్ హోటల్‌తో పాటు ముంబైలోని పలు ప్రాంతాలను ఉగ్రవాదులు లక్ష్యంగా చేసుకున్నారు.
ఈ ఘటనలో ప్రాణాలు కోల్పోయిన వారిని స్మరించుకుంటూ, ఉగ్రవాదంపై పోరులో భారత్‌-అమెరికా భాగస్వామ్యాన్ని మరింత బలోపేతం చేయాల్సిన అవసరాన్ని రూబియో ప్రస్తావించారు. ఉగ్రవాదాన్ని ఎదుర్కోవడంలో ఇరు దేశాల ఉమ్మడి నిబద్ధతను ఈ పర్యటన మరోసారి చాటిందని సంబంధిత వర్గాలు పేర్కొన్నాయి.
