ఖిలా వరంగల్‌లో కుష్టు వ్యాధి గుర్తింపు సర్వే ప్రారంభం
14 రోజులపాటు ఇంటింటి తనిఖీలు.. బాధితులకు ఉచిత చికిత్స
వరంగల్ | ఎన్ టుడే న్యూస్‌: ఖిలా వరంగల్ గుండం చెరువు ప్రాంతంలో కుష్టు వ్యాధి గుర్తింపు కార్యక్రమాన్ని వైద్య ఆరోగ్యశాఖ అధికారులు ప్రారంభించారు. ఇందులో భాగంగా ఆశా కార్యకర్తలు 14 రోజులపాటు ఇంటింటికీ వెళ్లి ప్రజలను పరిశీలించి, వ్యాధి అనుమానిత లక్షణాలను గుర్తించనున్నారు.
ప్రభుత్వ ఆరోగ్య కేంద్రాల్లో ఉచిత చికిత్స
సర్వేలో కుష్టు వ్యాధి అనుమానిత లక్షణాలు గుర్తించిన వారికి అవసరమైన వైద్య పరీక్షలు నిర్వహిస్తారు. వ్యాధి నిర్ధారణ అయిన వారికి ప్రభుత్వ ఆరోగ్య కేంద్రాల్లో ఉచిత చికిత్స అందించనున్నారు.
సర్వేకు సహకరించాలి: డీఎంహెచ్‌వో
కుష్టు వ్యాధిపై ప్రజలు అపోహలు వీడి, వైద్య సిబ్బందికి సహకరించాలని జిల్లా వైద్య ఆరోగ్యశాఖ అధికారి డాక్టర్‌ బి. రాజారెడ్డి కోరారు. వ్యాధిని ప్రారంభ దశలో గుర్తించి చికిత్స పొందడం ద్వారా ఆరోగ్య సమస్యలను తగ్గించుకోవచ్చని తెలిపారు.
