దక్షిణ బంగాళాఖాతంలో అల్పపీడన ద్రోణి.. ఏపీ, తమిళనాడుకు వర్ష సూచన

దక్షిణ బంగాళాఖాతంలో అల్పపీడన ద్రోణి ప్రభావంతో తమిళనాడు, ఆంధ్రప్రదేశ్‌లోని పలు ప్రాంతాల్లో వర్షాలు కురిసే అవకాశం ఉంది. తమిళనాడు తీర ప్రాంతాల్లో భారీ నుంచి అతి భారీ వర్షాలు కురుస్తున్నాయి. చెన్నైలోని మీనంబాకంలో అత్యధికంగా 12 సెంటీమీటర్ల వర్షపాతం నమోదుకాగా, నుంగంబాకంలో 11 సెంటీమీటర్ల వర్షపాతం నమోదైంది. మరో మూడు రోజుల పాటు తమిళనాడులో భారీ వర్షాలు కురిసే అవకాశం ఉండటంతో అధికారులు అప్రమత్తంగా ఉండాలని సూచిస్తున్నారు. సముద్రంలో పరిస్థితులు అనుకూలంగా లేని నేపథ్యంలో మత్స్యకారులు వేటకు వెళ్లవద్దని హెచ్చరించారు. మరోవైపు ఉత్తరాంధ్ర వరకు ద్రోణి విస్తరించి ఉన్నట్లు వాతావరణ పరిస్థితులు సూచిస్తున్నాయి. దీని ప్రభావంతో నేడు పోలవరం, కోనసీమ, మార్కాపురం జిల్లాల్లో వర్షాలు కురిసే అవకాశం ఉంది. ప్రకాశం, నెల్లూరు, వైఎస్సార్ కడప, చిత్తూరు, తిరుపతి జిల్లాల్లో పలుచోట్ల మోస్తరు వర్షాలు కురిసే అవకాశం ఉందని అంచనా వేస్తున్నారు. రైతులు, ప్రజలు వాతావరణ పరిస్థితులను గమనిస్తూ తగిన జాగ్రత్తలు తీసుకోవాలి.