ఇంద్రకీలాద్రిపై కనకదుర్గమ్మను దర్శించుకున్న మధ్యప్రదేశ్ సీఎం మోహన్ యాదవ్

మహాలక్ష్మీదేవి అలంకరణలో అమ్మవారికి ప్రత్యేక పూజలు

విజయవాడ, అక్టోబర్ 17 (ఎన్ టుడే న్యూస్): ఇంద్రకీలాద్రిపై కొలువుదీరిన శ్రీ కనకదుర్గమ్మను మధ్యప్రదేశ్ ముఖ్యమంత్రి మోహన్ యాదవ్ శనివారం దర్శించుకున్నారు. విజయవాడ ఎంపీ కేశినేని శివనాథ్ (చిన్ని)తో కలిసి శ్రీ దుర్గా మల్లేశ్వర స్వామివార్ల దేవస్థానానికి చేరుకున్న ఆయనకు ఆలయ అధికారులు, వేద పండితులు ఆలయ మర్యాదలతో స్వాగతం పలికారు.

అనంతరం మోహన్ యాదవ్ అమ్మవారి అంతరాలయంలో ప్రత్యేక పూజలు నిర్వహించారు. దసరా ఉత్సవాల్లో భాగంగా మహాలక్ష్మీదేవి అలంకరణలో ఉన్న అమ్మవారిని దర్శించుకుని మొక్కులు చెల్లించుకున్నారు.

పూజల అనంతరం ఆశీర్వచన మండపంలో వేద పండితులు మధ్యప్రదేశ్ ముఖ్యమంత్రికి వేదాశీర్వచనాలు అందజేశారు. ఈ సందర్భంగా దేవాదాయ శాఖ కమిషనర్ కె. రామచంద్రమోహన్, ఆలయ చైర్మన్ బొర్రా రాధాకృష్ణ, ఈవో వీకే శీనానాయక్ తదితరులు అమ్మవారి శేషవస్త్రాలు, ప్రసాదం, చిత్రపటాన్ని మోహన్ యాదవ్‌కు అందజేశారు.