మహిళపై కూడా సామూహిక అత్యాచారం కేసు నమోదు చేయవచ్చు ఢిల్లీ హైకోర్టు కీలక తీర్పు..

 నేరానికి సహకరిస్తే చట్టపరమైన చర్యలు ఢిల్లీ: సామూహిక అత్యాచారం కేసులో మహిళ ప్రత్యక్షంగా లైంగిక దాడికి పాల్పడకపోయినా, ఉమ్మడి కుట్రలో భాగంగా అత్యాచారం జరిగేందుకు సహకరిస్తే ఆమెపై కూడా కేసు నమోదు చేయవచ్చని ఢిల్లీ హైకోర్టు స్పష్టం చేసింది. నేరంలో పాల్గొన్న వ్యక్తి మహిళ అనే కారణంతో చట్టపరమైన బాధ్యత నుంచి మినహాయింపు లభించదని పేర్కొంది. జస్టిస్ అనూప్ జైరామ్ భంభానీ ఈ మేరకు తీర్పు వెలువరించారు. భారతీయ శిక్షాస్మృతిలోని సెక్షన్ 376D, భారతీయ న్యాయ సంహితలోని సెక్షన్ 70 ప్రకారం సామూహిక అత్యాచారం కేసులో మహిళ పాత్రను కూడా చట్టపరంగా పరిశీలించవచ్చని కోర్టు అభిప్రాయపడింది. చట్టంలో ఉపయోగించిన ‘వ్యక్తులు’ అనే పదాన్ని కేవలం పురుషులకే పరిమితం చేయడానికి హేతుబద్ధమైన కారణం లేదని న్యాయమూర్తి పేర్కొన్నట్లు వెల్లడైంది. మైనర్ బాలిక కేసులో తీర్పు తన మైనర్ కుమార్తెను బెదిరించి మరో వ్యక్తితో లైంగిక సంబంధానికి ఒత్తిడి చేసినట్లు ఆరోపణలు ఎదుర్కొంటున్న మహిళ దాఖలు చేసిన పిటిషన్‌పై కోర్టు ఈ వ్యాఖ్యలు చేసింది. తాను మహిళను కావడంతో సామూహిక అత్యాచారానికి సంబంధించిన నిబంధనలు తనకు వర్తించవని ఆమె వాదించింది. అయితే, ఈ వాదనను కోర్టు అంగీకరించలేదు. అదే సమయంలో, ఒక మహిళ ఒంటరిగా సామూహిక అత్యాచారం నేరానికి పాల్పడినట్లు పరిగణించలేమని, అయితే ఇతరులతో కలిసి నేరానికి కుట్ర పన్నడం లేదా నేరం జరిగేందుకు ఉద్దేశపూర్వకంగా సహకరించడం వంటి పరిస్థితుల్లో సంబంధిత నిబంధనలు వర్తించే అవకాశం ఉంటుందని కోర్టు స్పష్టం చేసింది. ఈ తీర్పు ద్వారా నేరంలో వ్యక్తి లింగం కంటే, నేరంలో అతడి లేదా ఆమె పాత్ర, ఉమ్మడి ఉద్దేశం, సహకారం వంటి అంశాలు చట్టపరమైన పరిశీలనలో కీలకమని స్పష్టమవుతోంది.