రెండు జెడ్పీటీసీ స్థానాలకు టీడీపీ అభ్యర్థిగా మజ్జి సిరిసహస్ర నామినేషన్లు
కార్యకర్తలకు ఎప్పుడూ అందుబాటులో ఉంటా: సిరిసహస్ర
బేబీనాయన, కోళ్ల లలితకుమారి, తెంటు లక్ష్మీనాయుడు ఆధ్వర్యంలో పత్రాల సమర్పణ
విజయనగరం జిల్లా: జడ్పీ చైర్‌పర్సన్ మజ్జి శ్రీనివాసరావు (చిన్న శ్రీను) కుమార్తె మజ్జి సిరిసహస్ర తెలుగుదేశం పార్టీ అభ్యర్థిగా నామినేషన్ పత్రాలు దాఖలు చేశారు. కొత్తవలస, తెర్లాం మండలాల జెడ్పీటీసీ స్థానాలకు ఆమె నామినేషన్లు సమర్పించారు.
బొబ్బిలి ఎమ్మెల్యే బేబీనాయన, ఎస్‌.కోట ఎమ్మెల్యే కోళ్ల లలితకుమారి, మాజీ ఎమ్మెల్యే, బుడా చైర్మన్ తెంటు లక్ష్మీనాయుడు ఆధ్వర్యంలో సిరిసహస్ర సంబంధిత అధికారులకు నామినేషన్ పత్రాలు అందజేశారు. ఈ సందర్భంగా కొత్తవలస, తెర్లాం మండలాల నుంచి కూటమి నాయకులు, కార్యకర్తలు పెద్ద సంఖ్యలో తరలివచ్చి ఆమెకు మద్దతు తెలిపారు.
నామినేషన్ల అనంతరం సిరిసహస్ర మాట్లాడుతూ తన తండ్రి చిన్న శ్రీను చూపిన మార్గంలో నడుస్తూ ప్రజలకు సేవ చేయాలనే లక్ష్యంతో ముందుకు సాగుతానని తెలిపారు. పార్టీ కార్యకర్తలకు ఎప్పటిలాగే అందుబాటులో ఉంటూ, వారి సమస్యల పరిష్కారానికి కృషి చేస్తానని హామీ ఇచ్చారు.
