పిడుగుపాటుకు గురై వ్యక్తి మృతి

గేదెలను మేపేందుకు పొలానికి వెళ్లి తిరిగిరాని వైనం

మర్రిపూడి (ఎన్ టుడే న్యూస్): ప్రకాశం జిల్లా మర్రిపూడి మండలం అయ్యవారిపాలెం గ్రామానికి చెందిన జాస్టీ శ్రీను గురువారం సాయంత్రం పిడుగుపాటుకు గురై మృతి చెందాడు.

రోజూ మాదిరిగానే శ్రీను గేదెలను తోలుకొని పొలానికి వెళ్లాడు. సాయంత్రం ఐదు గంటల సమయంలో ఉరుములు, మెరుపులతో కూడిన వర్షం కురవడంతో పొలంలోనే పిడుగుపాటుకు గురయ్యాడు.

గేదెలు ఇంటికి చేరుకున్నప్పటికీ శ్రీను తిరిగి రాకపోవడంతో ఆందోళన చెందిన కుటుంబ సభ్యులు పొలానికి వెళ్లి వెతికారు. అక్కడ ఆయన మృతదేహాన్ని గుర్తించడంతో కుటుంబ సభ్యులు కన్నీరుమున్నీరుగా విలపించారు. ఈ ఘటనతో గ్రామంలో విషాదఛాయలు అలుముకున్నాయి.