ఎన్నికల టికెట్ ఆశతో పెళ్లి.. చివరికి నిరాశే మిగిలింది!
సాలూరు మున్సిపల్ చైర్‌పర్సన్ స్థానం జనసేనకు కేటాయింపు.. టీడీపీ నేత హర్షవర్ధన్ ఆశలపై నీళ్లు
ఆంధ్రప్రదేశ్: మున్సిపల్ ఎన్నికల్లో పార్టీ టికెట్‌పై ఆశలు పెట్టుకున్న ఓ టీడీపీ నేత ముందుగానే పెళ్లి చేసుకున్న ఘటన చర్చనీయాంశంగా మారింది. సాలూరు మున్సిపల్ చైర్‌పర్సన్ స్థానాన్ని బీసీ మహిళకు కేటాయించడంతో తన ప్రేయసి మంజీరను టీడీపీ నేత హర్షవర్ధన్ హడావుడిగా వివాహం చేసుకున్నట్లు ప్రచారం జరుగుతోంది. తాను పెళ్లి చేసుకుంటే తన భార్యకు పార్టీ టికెట్ దక్కుతుందనే ఆశతో, బంధుమిత్రులను పిలవకుండా గుడిలోనే వివాహం చేసుకున్నట్లు సమాచారం. అయితే కూటమిలో సీట్ల సర్దుబాటులో సాలూరు మున్సిపల్ చైర్‌పర్సన్ స్థానం జనసేన పార్టీకి కేటాయించడంతో ఆయన ఆశలు నెరవేరని పరిస్థితి ఏర్పడింది.
హర్షవర్ధన్, మంజీర ఎనిమిదేళ్లుగా ప్రేమించుకుంటున్నారని, మరో ఆరు నెలల తర్వాత వివాహం చేసుకోవాలని ముందుగా నిర్ణయించుకున్నారని తెలుస్తోంది. అయితే ఎన్నికల టికెట్ కోసం ఎదురుచూస్తూ వివాహాన్ని ముందుకు జరిపినట్లు ప్రచారం సాగుతోంది. చివరకు సీట్ల సర్దుబాటుతో ఆశించిన అవకాశం దక్కకపోవడంతో ఈ వ్యవహారం స్థానికంగా చర్చకు దారితీసింది. అయితే ఈ ఘటనకు సంబంధించిన వివరాలు, వివాహం వెనుక ఉన్న కారణాలపై అధికారిక నిర్ధారణ అందుబాటులో లేదు.
