మైనర్ బాలికపై అత్యాచారం.. అనంతరం హత్య చేసినట్లు ఆరోపణ

• జార్ఖండ్‌లోని రాంచీలో దారుణ ఘటన
  
• నిందితుడు భగవత్ మెహతో అరెస్ట్

రాంచీ, జార్ఖండ్ | ఎన్ టుడే న్యూస్: జార్ఖండ్ రాజధాని రాంచీలోని మార్దు గ్రామంలో 17 ఏళ్ల మైనర్ బాలికపై అత్యాచారం చేసి, అనంతరం హత్య చేసిన ఘటన వెలుగులోకి వచ్చింది. ఈ కేసులో భగవత్ మెహతో (23) అనే యువకుడిని పోలీసులు అరెస్టు చేశారు.

నదిలో స్నానానికి వెళ్దామని పిలిచి..

భగవత్ మెహతో నదిలో స్నానం చేద్దామని చెప్పి బాలికను తన వద్దకు పిలిచినట్లు సమాచారం. ఐదు నిమిషాల్లో తిరిగి వస్తానని ఇంట్లో చెప్పి బాలిక అతడి వద్దకు వెళ్లింది. అయితే, నది వద్దకు తీసుకెళ్లకుండా చెట్ల పొదల్లోకి తీసుకెళ్లి ఆమెపై అత్యాచారానికి పాల్పడినట్లు ఆరోపణలు ఉన్నాయి.

ఈ విషయం బయటకు చెబుతుందనే భయంతో బాలికను హత్య చేసినట్లు పోలీసులు అనుమానిస్తున్నారు. అనంతరం నిందితుడు అక్కడి నుంచి వెళ్లిపోయినట్లు సమాచారం.

కనిపించకపోవడంతో పోలీసులకు ఫిర్యాదు..

సాయంత్రమైనా కుమార్తె ఇంటికి తిరిగి రాకపోవడంతో కుటుంబ సభ్యులు ఆమె కోసం వెతికారు. ఆచూకీ లభించకపోవడంతో బాలిక తండ్రి పోలీసులకు ఫిర్యాదు చేశారు. పోలీసులు మిస్సింగ్ కేసు నమోదు చేసి దర్యాప్తు చేపట్టారు.

ఈ క్రమంలో చెట్ల పొదల్లో బాలిక మృతదేహం లభ్యమైంది. దర్యాప్తులో భగవత్ మెహతోపై అనుమానం రావడంతో అతడిని అదుపులోకి తీసుకుని అరెస్టు చేసినట్లు సమాచారం. ఘటనపై పోలీసులు తదుపరి దర్యాప్తు కొనసాగిస్తున్నారు.