ఘనంగా గంగమ్మ తల్లి జలాభిషేకంలో పాల్గొన్న ఎమ్మెల్యే రామచంద్ర నాయక్

• ఎల్‌నినో ప్రభావం నుంచి ప్రజలను కాపాడాలి..
• సమృద్ధిగా వర్షాలు కురిసి పాడిపంటలు పండాలి: ప్రభుత్వ విప్

కురవి (ఎన్‌ టుడే న్యూస్‌), అక్టోబర్ 26: మహబూబాబాద్ జిల్లా కురవి మండలం అయ్యగారిపల్లి గ్రామంలో గంగమ్మ తల్లి తృతీయ వార్షిక జాతర వేడుకలు ఘనంగా నిర్వహించారు. ఈ సందర్భంగా డోర్నకల్ ఎమ్మెల్యే, ప్రభుత్వ విప్ డాక్టర్ రామచంద్ర నాయక్ గ్రామ సర్పంచ్ జక్కుల మాధవి నాగన్నతో కలిసి అమ్మవారిని దర్శించుకుని ప్రత్యేక పూజలు నిర్వహించారు. అనంతరం అమ్మవారి ఆశీస్సులు పొందారు.

ఘనంగా జలాభిషేకం.. బోనాల సమర్పణ

గంగమ్మ తల్లి వేడుకల్లో భాగంగా యాదవ మహిళలు తమ ఇళ్ల నుంచి రాగి బిందెల్లో నీటిని తీసుకువచ్చి అమ్మవారికి భక్తిశ్రద్ధలతో జలాభిషేకం నిర్వహించారు. అనంతరం బోనాలు సమర్పించి మొక్కులు చెల్లించుకున్నారు. గ్రామం, ప్రాంతం సుభిక్షంగా ఉండాలని, ప్రజలందరూ సుఖసంతోషాలతో జీవించాలని భక్తులు ప్రార్థించారు.

సమృద్ధిగా వర్షాలు కురిసి పంటలు పండాలి

ఈ సందర్భంగా ఎమ్మెల్యే రామచంద్ర నాయక్ మాట్లాడుతూ, ఎల్‌నినో ప్రభావం నుంచి రాష్ట్ర ప్రజలను కాపాడాలని, సమృద్ధిగా వర్షాలు కురిసి నీటి వనరులు నిండాలని, పాడిపంటలు బాగా పండాలని గంగమ్మ తల్లిని ప్రార్థించినట్లు తెలిపారు. ప్రజలకు ఎలాంటి ఇబ్బందులు కలగకుండా గ్రామాన్ని, ప్రాంతాన్ని అమ్మవారు చల్లగా చూడాలని కోరుకున్నట్లు చెప్పారు.

బియ్యం ధరలు తగ్గి సామాన్యులకు ఊరట కలగాలి

బియ్యం ధరలు విపరీతంగా పెరుగుతుండటంపై ఎమ్మెల్యే ఆందోళన వ్యక్తం చేశారు. రెండు పూటలా భోజనం చేయడానికి అవసరమైన బియ్యం ధరలు పెరగడం వల్ల సామాన్య ప్రజలు ఇబ్బందులు ఎదుర్కొంటున్నారని పేర్కొన్నారు. పంటల దిగుబడులు తగ్గుతున్నాయనే కారణంతో మిల్లర్లు ధరలు పెంచుతున్నారనే ఆందోళనలు ప్రజల్లో ఉన్నాయని అన్నారు. బియ్యం ధరలు తగ్గి పేద, మధ్యతరగతి కుటుంబాలకు ఊరట కలగాలని అమ్మవారిని వేడుకున్నట్లు తెలిపారు.

నీటిని పొదుపుగా వినియోగించుకోవాల్సిన బాధ్యత ప్రతి ఒక్కరిపై ఉందని, వర్షపు నీటిని సద్వినియోగం చేసుకుంటూ నీటి వనరులను కాపాడుకోవాలని ఈ సందర్భంగా పిలుపునిచ్చారు.

పలువురు ప్రముఖుల హాజరు

ఈ కార్యక్రమంలో దొంగల జనార్దన్ రెడ్డి, జక్కుల నాగన్న, మహిళా భక్తులు, మాజీ సర్పంచులు నరసింగం, వెంకన్న, వార్డు సభ్యుడు బుడిగ రమేష్, మాజీ ఎంపీటీసీలు, గ్రామ పెద్దలు, యాదవ సంఘం నాయకులు, తదితరులు పాల్గొన్నారు.