పుదిపట్ల వైష్ణవి దేవి ఆలయంలో వైభవంగా మూల నక్షత్ర పూజలు

సరస్వతీ దేవి అలంకరణలో దర్శనమిచ్చిన అమ్మవారు.. భక్తులతో కిటకిటలాడిన ఆలయం

చౌడేపల్లి: అన్నమయ్య జిల్లా చౌడేపల్లి మండలం పుదిపట్ల గ్రామంలో వెలసిన స్వయంభు వైష్ణవి దేవి ఆలయంలో దసరా నవరాత్రుల సందర్భంగా ఆరవ రోజు మూల నక్షత్రాన్ని పురస్కరించుకుని ప్రత్యేక పూజలు నిర్వహించారు. ఆలయ అర్చకురాలు శ్రావణి అమ్మవారికి తేనెతో అభిషేకం చేశారు. అనంతరం సరస్వతీ దేవి అలంకరణలో అమ్మవారిని భక్తులకు దర్శనమిచ్చేలా అలంకరించారు.

ఈ సందర్భంగా బెంగళూరుకు చెందిన మహిళా భక్తులు సంగీత గానం చేశారు. అనంతరం అమ్మవారిని దర్శించుకుని ప్రత్యేక పూజల్లో పాల్గొన్నారు. చౌడేపల్లి, పుంగనూరు మండలాల నుంచి భక్తులు పెద్ద సంఖ్యలో ఆలయానికి తరలివచ్చారు.

ఆలయ ధర్మకర్త వినోద్ కుమార్ రెడ్డి భక్తులకు తీర్థప్రసాదాలు అందజేశారు. నవరాత్రుల సందర్భంగా ఆలయంలో భక్తి వాతావరణం నెలకొంది.