70 మందికి పైగా పిల్లలు.. కుటుంబ పోషణకు తండ్రి తిప్పలు!
- నలుగురు భార్యలు.. ప్రస్తుతం 58 మంది పిల్లలు
- కార్ల షోరూమ్‌లో వచ్చే స్వల్ప ఆదాయంతోనే కుటుంబ పోషణ
- కనీస అవసరాలు తీరక ఇబ్బందులు పడుతున్న కుటుంబం
- ఒక్కో కారు అమ్మితే రూ.1,000 ఆఫ్ఘానీలు
- కనీస సౌకర్యాలు లేక అవస్థలు
ఆఫ్ఘనిస్థాన్ | ఎన్ టుడే న్యూస్: భారీ కుటుంబాన్ని పోషించలేక ఓ తండ్రి తీవ్ర ఇబ్బందులు ఎదుర్కొంటున్న ఘటన ఆఫ్ఘనిస్థాన్‌లో వెలుగులోకి వచ్చింది. ఓ వ్యక్తికి నలుగురు భార్యల ద్వారా 70 మందికి పైగా పిల్లలు జన్మించగా, ప్రస్తుతం వారిలో 58 మంది బతికున్నట్లు సమాచారం. ఇంత పెద్ద కుటుంబానికి కనీసం పూట గడవడం కూడా కష్టంగా మారిందని తెలుస్తోంది.
సదరు వ్యక్తి ఓ కార్ల షోరూమ్‌లో పనిచేస్తున్నాడు. ఒక్కో కారు విక్రయించినప్పుడు సుమారు 1,000 ఆఫ్ఘానీలు (దాదాపు 15 అమెరికన్ డాలర్లు) మాత్రమే కమీషన్‌గా లభిస్తున్నట్లు సమాచారం. ఈ స్వల్ప ఆదాయమే కుటుంబ పోషణకు ప్రధాన ఆధారంగా మారింది.
కుటుంబ సభ్యుల సంఖ్యకు తగిన ఆదాయం లేకపోవడంతో పిల్లలకు ఆహారం అందించడం కూడా కష్టమవుతున్నట్లు తెలుస్తోంది. సరైన ఇల్లు, తలుపులు, కిటికీలు వంటి కనీస సౌకర్యాలు లేకపోవడంతో పాటు పిల్లలకు చెప్పులు కొనివ్వలేని దుస్థితి నెలకొన్నట్లు సమాచారం. ఈ కుటుంబంలో చిన్న బిడ్డ వయసు కేవలం మూడు నెలలేనని తెలుస్తోంది.
భారీ కుటుంబం, పరిమిత ఆదాయం కారణంగా ఆ తండ్రి ఎదుర్కొంటున్న పరిస్థితులు కుటుంబ పోషణలో ఆర్థిక స్థిరత్వం ఎంత ముఖ్యమో తెలియజేస్తున్నాయి.
