నిర్మాణ వ్యర్థాల డిస్పోజల్ సర్టిఫికేట్ తప్పనిసరి!
బిల్డింగ్‌ పర్మిషన్లలో కొత్త నిబంధనలు.. అక్రమ డంపింగ్‌కు చెక్
హైదరాబాద్ | Ntoday News
నిర్మాణ వ్యర్థాలను (C&D Waste) అక్రమంగా డంపింగ్‌ చేయకుండా నియంత్రించేందుకు తెలంగాణ ప్రభుత్వం కీలక నిర్ణయం తీసుకుంది. భవన నిర్మాణ అనుమతుల ప్రక్రియలో నిర్మాణ వ్యర్థాల నిర్వహణకు సంబంధించిన నిబంధనలను తప్పనిసరి చేస్తూ GO 841 జారీ చేసినట్లు సమాచారం.
ఇకపై GHMC, CMC, MMC, HMDA పరిధిలో భవన నిర్మాణ అనుమతుల కోసం ‘బిల్డ్ నౌ’ పోర్టల్‌లో దరఖాస్తు చేసుకునే సమయంలోనే నిర్మాణ వ్యర్థాల నిర్వహణకు సంబంధించిన ప్రణాళికను సమర్పించాల్సి ఉంటుంది.
నిర్మాణ సమయంలో వెలువడే వ్యర్థాలను నిర్ణీత నిబంధనల ప్రకారం అధీకృత రీసైక్లర్లు లేదా సంబంధిత అనుమతులు కలిగిన సంస్థల ద్వారా మాత్రమే తరలించి డిస్పోజ్‌ చేయాల్సి ఉంటుంది. నిర్మాణ వ్యర్థాల నిర్వహణలో నిబంధనలు పాటించేలా అధికారులు పర్యవేక్షించనున్నారు.
అంతేకాకుండా భవనం పూర్తయిన అనంతరం ఆక్యుపెన్సీ సర్టిఫికేట్ (OC) పొందే ముందు నిర్మాణ వ్యర్థాలను నిబంధనల ప్రకారం డిస్పోజ్‌ చేసినట్లు ధ్రువీకరించే డిస్పోజల్ సర్టిఫికేట్ సమర్పించడం తప్పనిసరి కానుంది.
ఈ నిబంధనల ద్వారా రోడ్ల పక్కన, ఖాళీ స్థలాల్లో, ఇతర ప్రాంతాల్లో నిర్మాణ వ్యర్థాలను అక్రమంగా పడేయడాన్ని అరికట్టడంతో పాటు వాటి రీసైక్లింగ్‌ను ప్రోత్సహించేందుకు ప్రభుత్వం చర్యలు తీసుకుంటోంది.
