నేహా బోరా గొప్ప ఉద్యమ కెరటం డి హరినాథ్

విస్సన్నపేటలో సీపీఐ(ఎంఎల్) రాష్ట్ర కార్యవర్గ సభ్యుడు డి. హరినాథ్ వ్యాఖ్యలు విస్సన్నపేట: విద్యార్థి ఉద్యమాల్లో ప్రముఖ పాత్ర పోషిస్తున్న జాతీయ స్థాయి నాయకురాలు నేహా బోరా పోరాట స్ఫూర్తి యువతకు ఆదర్శంగా నిలుస్తోందని సీపీఐ(ఎంఎల్) రాష్ట్ర కార్యవర్గ సభ్యుడు డి. హరినాథ్ అన్నారు. ఎన్టీఆర్ జిల్లా విస్సన్నపేటలో నిర్వహించిన పత్రికా సమావేశంలో ఆయన మాట్లాడుతూ, జంతర్ మంతర్ వద్ద ఆమె చేపట్టిన దీక్ష సందర్భంగా విజయవాడకు వచ్చినప్పుడు నేహా బోరాను కలిసినట్లు తెలిపారు. దేశ రాజకీయాల్లో తన వాగ్దాటితో, పోరాట పటిమతో నేహా బోరా ప్రత్యేక గుర్తింపు పొందారని హరినాథ్ పేర్కొన్నారు. మతతత్వ రాజకీయాలకు వ్యతిరేకంగా ఆమె చేస్తున్న పోరాటం ప్రజల్లో చర్చకు దారితీస్తోందన్నారు. తనతో పాటు మహిళా పాత్రికేయుల పట్ల కొందరు పోలీసు సిబ్బంది అనుచితంగా, లైంగిక వేధింపులకు పాల్పడ్డారనే ఆరోపణలపై కేసులు నమోదు చేయించడం ద్వారా ఈ వ్యవహారాన్ని ప్రజల ముందుకు తీసుకువచ్చారని తెలిపారు. మహిళల రక్షణపై పాలకులు చేస్తున్న ప్రకటనలకు, క్షేత్రస్థాయిలో ఎదురవుతున్న పరిస్థితులకు మధ్య వ్యత్యాసం ఉందని హరినాథ్ విమర్శించారు. జంతర్ మంతర్ వద్ద జరిగిన ఉద్యమ పరిణామాలు, ఆ ప్రాంతంలో ఆంక్షలపై తీసుకున్న నిర్ణయాలు పాలకవర్గాల వైఖరిపై ప్రశ్నలు లేవనెత్తుతున్నాయని అన్నారు. విద్యార్థి ఉద్యమాలకే పరిమితం కాకుండా, ప్రజాస్వామ్య హక్కులు, ఓటు హక్కు పరిరక్షణ కోసం సాగుతున్న పోరాటాల్లో నేహా బోరా పాత్ర ప్రాధాన్యం సంతరించుకుందని పేర్కొన్నారు. ప్రజా సమస్యలపై నిర్భయంగా తన అభిప్రాయాలను వెల్లడిస్తూ, భవిష్యత్ ఉద్యమాలకు స్ఫూర్తినిస్తున్నారని అన్నారు. బీజేపీ ప్రభుత్వ విధానాలకు వ్యతిరేకంగా ప్రజాస్వామ్య, లౌకిక విలువలను కాపాడేందుకు ప్రజలు ఉద్యమించాలని హరినాథ్ పిలుపునిచ్చారు. “మోదీ హటావో–దేశ్ బచావో, ఓట్ చోరీ–గద్దీ ఛోడో” నినాదాలతో పాటు భారత రాజ్యాంగాన్ని రక్షించాలని, లౌకిక ప్రజాస్వామ్యాన్ని పరిరక్షించాలని ఆయన పిలుపునిచ్చారు.