పెనుగొలను శివాలయంలో సరస్వతీ అలంకరణ.. విద్యార్థులకు పరీక్ష ప్యాడ్ల పంపిణీ

మెట్టగుట్ట ఆలయంలో విద్యాలక్ష్మి అలంకరణ.. వైభవంగా దసరా ఉత్సవాలు

ఎన్టీఆర్ జిల్లా, తిరువూరు నియోజకవర్గం, గంపలగూడెం మండలం పెనుగొలను గ్రామంలోని శ్రీ గంగా పార్వతీ సమేత రామలింగేశ్వర స్వామి దేవాలయంలో దసరా ఉత్సవాలు వైభవంగా కొనసాగుతున్నాయి. ఉత్సవాల్లో భాగంగా శుక్రవారం ఆరవ రోజు శ్రీ పార్వతీ దేవికి శ్రీ సరస్వతీ దేవి అలంకరణ చేసి భక్తులకు దర్శనం కల్పించారు. అమ్మవారి దర్శనానికి భక్తులు తరలివచ్చి ప్రత్యేక పూజలు నిర్వహించారు. ఆలయ అర్చకులు దాములూరి సత్యనారాయణ శర్మ, వేద పండితులు ఇంద్రగంటి సుబ్రహ్మణ్య శర్మ ఆధ్వర్యంలో అమ్మవారికి కుంకుమ పూజలు, రామలింగేశ్వర స్వామికి ప్రత్యేక అభిషేకాలు నిర్వహించారు. చిన్నారుల భవిష్యత్తుకు విద్యాబాట వేయాలనే సంకల్పంతో సామూహిక అక్షరాభ్యాస కార్యక్రమాన్ని నిర్వహించారు. అనంతరం వేదమంత్రాల పారాయణం మధ్య చండీ హోమం నిర్వహించి లోకకల్యాణం కోసం ప్రార్థనలు చేశారు. ఈ సందర్భంగా ఇలాసాగరపు లక్ష్మీనారాయణ సహకారంతో ఆలయ కమిటీ సభ్యులు విద్యార్థులకు పరీక్షల సమయంలో ఉపయోగపడే ఎగ్జామ్ ప్యాడ్లను పంపిణీ చేశారు. విద్యార్థులకు అవసరమైన సామగ్రిని అందించడం అభినందనీయమని పలువురు పేర్కొన్నారు. కీర్తిశేషులు రామాల ముకుందు, ఆదెమ్మ జ్ఞాపకార్థం వారి కుమారుడు, విశ్రాంత ప్రొఫెసర్ నాగేశ్వరరావు సహకారంతో అన్నదాన కార్యక్రమం నిర్వహించారు. ఉత్సవాల్లో భాగంగా భక్తులకు ఆధ్యాత్మిక కార్యక్రమాలతో పాటు అన్నదానం ఏర్పాటు చేసినట్లు ఆలయ కమిటీ సభ్యులు తెలిపారు.

మెట్టగుట్ట ఆలయంలో విద్యాలక్ష్మి అలంకరణ

పెనుగొలను గ్రామ సరిహద్దులోని మెట్టగుట్ట శేషాచల శ్రీనివాస స్వామి ఆలయంలోనూ దసరా ఉత్సవాలు భక్తిశ్రద్ధలతో కొనసాగుతున్నాయి. ఉత్సవాల్లో భాగంగా గజలక్ష్మి దేవికి విద్యాలక్ష్మి అలంకరణ చేశారు. ఆలయ అర్చకులు టి. యోగానందాచార్యులు ఆధ్వర్యంలో చిన్నారులకు అక్షరాభ్యాస కార్యక్రమం నిర్వహించి, అమ్మవారికి కుంకుమ పూజలు చేశారు. వివిధ గ్రామాల నుంచి వచ్చిన భక్తులు స్వామివారిని, అమ్మవారిని దర్శించుకుని ప్రత్యేక పూజలు చేసి మొక్కులు చెల్లించుకున్నారు. భక్తుల సహకారంతో అన్నదాన కార్యక్రమాన్ని నిర్వహించినట్లు ఆలయ కమిటీ అధ్యక్షుడు పంది వెంకట్రావు తెలిపారు. దసరా ఉత్సవాల సందర్భంగా రెండు ఆలయాల్లోనూ ఆధ్యాత్మిక కార్యక్రమాలు, పూజలు, సేవా కార్యక్రమాలు భక్తులను ఆకట్టుకున్నాయి.