వైష్ణవి దేవి ఆలయంలో వైభవంగా పంచామృత అభిషేకం

భక్తిశ్రద్ధలతో ప్రత్యేక పూజలు.. అమ్మవారిని దర్శించుకున్న భక్తులు

చౌడేపల్లి: అన్నమయ్య జిల్లా చౌడేపల్లి మండలం పుదీపట్ల గ్రామంలోని స్వయంభు వైష్ణవి దేవి ఆలయంలో శుక్రవారం ప్రత్యేక పూజలు భక్తిశ్రద్ధలతో నిర్వహించారు. ఈ సందర్భంగా అమ్మవారికి పంచామృత అభిషేకం నిర్వహించి, వివిధ రకాల పుష్పాలతో సుందరంగా అలంకరించారు.

ఆలయ అర్చకురాలు శ్రావణి తెల్లవారుజామునే అమ్మవారికి పంచామృత అభిషేకం నిర్వహించి, అనంతరం ప్రత్యేక అలంకరణ చేశారు. పూజల అనంతరం భక్తులకు అమ్మవారి దర్శనానికి అవకాశం కల్పించారు.

ఈ ప్రత్యేక పూజలకు బెంగళూరుకు చెందిన సావిత్రి ఉభయదారుగా వ్యవహరించారు. అనంతరం ఆలయ ధర్మకర్త వినోద్ కుమార్ భక్తులకు తీర్థప్రసాదాలు పంపిణీ చేశారు. పలువురు భక్తులు ఆలయానికి చేరుకుని అమ్మవారిని దర్శించుకుని ప్రత్యేక పూజల్లో పాల్గొన్నారు.

భక్తుల రాకతో ఆలయ ప్రాంగణం ఆధ్యాత్మిక వాతావరణాన్ని సంతరించుకుంది.