స్థానిక ఎన్నికల ప్రక్రియ పూర్తయ్యే వరకు పీజీఆర్‌ఎస్ రద్దు
- ఆన్‌లైన్‌లో ఫిర్యాదుల నమోదు.. 1100కు ఫోన్ చేసి స్థితి తెలుసుకోవచ్చు ఏలూరు జిల్లా కలెక్టర్
ఏలూరు, అక్టోబర్ 25: ఏలూరు జిల్లాలో స్థానిక సంస్థల ఎన్నికల ప్రవర్తనా నియమావళి అమల్లో ఉన్న నేపథ్యంలో ప్రజా ఫిర్యాదుల పరిష్కార వేదిక (పీజీఆర్‌ఎస్) కార్యక్రమాన్ని తాత్కాలికంగా రద్దు చేసినట్లు జిల్లా కలెక్టర్ కె. వెట్రిసెల్వి తెలిపారు. స్థానిక సంస్థల ఎన్నికల ప్రక్రియ పూర్తయ్యే వరకు, అంటే డిసెంబర్ 3వ తేదీ వరకు పీజీఆర్‌ఎస్ కార్యక్రమం నిర్వహించబోమని ఆదివారం విడుదల చేసిన ప్రకటనలో పేర్కొన్నారు. ప్రజలు తమ సమస్యలు, ఫిర్యాదులను తెలియజేసేందుకు ప్రత్యామ్నాయ మార్గాలను వినియోగించుకోవచ్చని సూచించారు. ఫిర్యాదుదారులు ప్రభుత్వ అధికారిక వెబ్‌సైట్ meekosam.ap.gov.in ద్వారా తమ అర్జీలను నమోదు చేసుకోవడంతో పాటు, ఇప్పటికే సమర్పించిన ఫిర్యాదుల ప్రస్తుత స్థితిని కూడా తెలుసుకోవచ్చని వివరించారు. అలాగే 1100 టోల్‌ఫ్రీ నంబర్‌కు ఫోన్ చేసి ఫిర్యాదులు నమోదు చేయడంతో పాటు, వాటి పరిష్కారానికి సంబంధించిన వివరాలను తెలుసుకోవచ్చని కలెక్టర్ వెల్లడించారు. ప్రజలు ఈ ప్రత్యామ్నాయ సేవలను వినియోగించుకుని తమ సమస్యలను అధికారుల దృష్టికి తీసుకురావాలని సూచించారు.
