తెలంగాణ రక్షణ సేన విద్యార్థి విభాగం హనుమకొండ జిల్లా అధ్యక్షుడిగా పోగుల సుతేజ్

పార్టీ బలోపేతానికి చేసిన కృషికి గుర్తింపుగా బాధ్యతలు అప్పగింత

హనుమకొండ, అక్టోబర్ 21: తెలంగాణ రక్షణ సేన విద్యార్థి విభాగం హనుమకొండ జిల్లా అధ్యక్షుడిగా పోగుల సుతేజ్ నియమితులయ్యారు. ఈ మేరకు పార్టీ చీఫ్ కల్వకుంట్ల కవిత ఆయన నియామకాన్ని ప్రకటించారు.

పార్టీ ఆవిర్భావం నుంచి ఉమ్మడి వరంగల్ జిల్లాలో తెలంగాణ రక్షణ సేన బలోపేతానికి సుతేజ్ చేసిన కృషి, విద్యార్థి విభాగం అభివృద్ధికి చూపిన చొరవను గుర్తించి ఈ బాధ్యతలు అప్పగించినట్లు పార్టీ వర్గాలు వెల్లడించాయి.

విద్యార్థులు, యువతను రాజకీయ, సామాజిక కార్యక్రమాల్లో భాగస్వాములను చేయడంతో పాటు వారి సమస్యలపై స్పందించడం, పార్టీ సిద్ధాంతాలు, ఆశయాలను ప్రజల్లోకి తీసుకెళ్లడం విద్యార్థి విభాగం ముందున్న ప్రధాన లక్ష్యాలుగా ఉన్నాయి. ఈ నేపథ్యంలో జిల్లాలో విద్యార్థి విభాగాన్ని బలోపేతం చేయడం, యువతను సంఘటితం చేయడం, విద్యార్థుల సమస్యల పరిష్కారానికి కృషి చేయడం వంటి అంశాలపై కొత్తగా నియమితులైన జిల్లా అధ్యక్షుడు దృష్టి సారించనున్నారు.

తనకు జిల్లా అధ్యక్ష బాధ్యతలు అప్పగించిన పార్టీ చీఫ్ కల్వకుంట్ల కవితకు పోగుల సుతేజ్ కృతజ్ఞతలు తెలిపారు. పార్టీ అభివృద్ధికి, విద్యార్థి విభాగం విస్తరణకు కృషి చేస్తూ తనకు అప్పగించిన బాధ్యతలను సమర్థవంతంగా నిర్వహిస్తానని పేర్కొన్నారు.