అమరవీరుల కుటుంబాలకు పోలీసు శాఖ అండగా ఉంటుంది -- ఎస్పీ శరత్ చంద్ర పవార్

1994లో నక్సలైట్ల దాడిలో అమరుడైన ఎస్‌ఐ లక్ష్మయ్య కుటుంబానికి ఎస్పీ పరామర్శ

NTODAY NEWS :  నల్గొండ 

పోలీస్ విధి నిర్వహణలో ప్రాణాలు అర్పించిన అమరవీరుల కుటుంబాలకు పోలీసు శాఖ ఎల్లప్పుడూ అండగా ఉంటుందని నల్లగొండ జిల్లా ఎస్పీ శరత్ చంద్ర పవార్ భరోసా ఇచ్చారు. పోలీసు అమరవీరుల సంస్మరణ వారోత్సవాల్లో భాగంగా 1994లో నక్సలైట్ల దాడిలో అమరుడైన ఎస్‌ఐ లక్ష్మయ్య కుటుంబ సభ్యులను ఆయన పరామర్శించారు. ఈ సందర్భంగా కుటుంబ సభ్యుల యోగక్షేమాలను అడిగి తెలుసుకుని, వారికి ధైర్యం చెప్పారు. ఈ సందర్భంగా ఎస్పీ మాట్లాడుతూ విధి నిర్వహణలో ఇప్పటివరకు 15 మంది పోలీసు సిబ్బంది అమరులయ్యారని పేర్కొన్నారు. ప్రజల రక్షణ, శాంతిభద్రతల పరిరక్షణ కోసం ప్రాణాలను సైతం లెక్కచేయకుండా విధులు నిర్వర్తించిన పోలీసు అమరవీరుల త్యాగాలు వెలకట్టలేనివని అన్నారు. వారి సేవలను సమాజం ఎప్పటికీ గుర్తుంచుకుంటుందని తెలిపారు. అమరవీరుల కుటుంబాలకు ఏవైనా సమస్యలు ఎదురైతే పోలీసు శాఖ దృష్టికి తీసుకురావాలని సూచించారు. వారి సమస్యలను పరిష్కరించేందుకు, అవసరమైన సహాయ సహకారాలు అందించేందుకు పోలీసు శాఖ ఎల్లప్పుడూ సిద్ధంగా ఉంటుందని హామీ ఇచ్చారు. అమరవీరుల కుటుంబాల సంక్షేమానికి ప్రాధాన్యత ఇస్తూ, వారికి అండగా నిలుస్తామని ఎస్పీ స్పష్టం చేశారు