విద్యుత్‌ శాఖ ఏఈ లలిత కుమారి అనుమానాస్పద మృతి
కొండంపేట శ్మశాన వాటిక సమీపంలో రక్తపు మడుగులో మృతదేహం
హత్య కోణంలో దర్యాప్తు: డీఎస్పీ రాఘవులు
విజయనగరం | ఎన్ టుడే న్యూస్‌: విజయనగరం జిల్లా చీపురుపల్లిలో విద్యుత్‌ శాఖ అసిస్టెంట్‌ ఇంజినీర్‌ (ఏఈ)గా పనిచేస్తున్న గుడివాడ లలిత కుమారి అనుమానాస్పద స్థితిలో మృతి చెందారు. రాజాం మండలం కొండంపేట శ్మశాన వాటిక సమీపంలో ఆమె మృతదేహం రక్తపు మడుగులో లభ్యమైంది. ఈ ఘటన స్థానికంగా కలకలం రేపింది.
యోగా సెంటర్‌కు వెళ్తుండగా ఘటన
లలిత కుమారి వేకువజామున స్కూటీపై యోగా సెంటర్‌కు వెళ్లినట్లు సమాచారం. కొండంపేట శ్మశాన వాటిక సమీపంలో ఆమె మృతదేహాన్ని గుర్తించారు. ఆమెను గుర్తుతెలియని వ్యక్తులు హత్య చేసి, ఘటనను రోడ్డు ప్రమాదంగా చిత్రీకరించేందుకు ప్రయత్నించారని మృతురాలి కుటుంబ సభ్యులు ఆరోపిస్తున్నారు.
తలపై తీవ్ర గాయాలు.. పోలీసుల దర్యాప్తు
లలిత కుమారి తలపై తీవ్ర గాయాలు ఉన్నట్లు పోలీసులు గుర్తించారు. ఈ నేపథ్యంలో కేసును హత్య కోణంలో దర్యాప్తు చేస్తున్నట్లు డీఎస్పీ రాఘవులు వెల్లడించారు.
లలిత కుమారి మృతికి గల కారణాలు, ఘటన వెనుక ఉన్న పరిస్థితులపై పోలీసులు దర్యాప్తు చేస్తున్నారు. ఈ కేసుకు సంబంధించి మరిన్ని వివరాలు వెల్లడికావాల్సి ఉంది.
