ఏపీలో రాష్ట్రపతి పాలన విధించాలి: వైఎస్ జగన్ డిమాండ్

ఆంధ్రప్రదేశ్‌లో స్థానిక సంస్థల ఎన్నికల నామినేషన్ల సందర్భంగా చోటుచేసుకుంటున్న పరిణామాలపై వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి తీవ్రంగా స్పందించారు. రాష్ట్రంలో రాజ్యాంగ వ్యవస్థ కుప్పకూలిపోయిందని, ప్రజాస్వామ్యాన్ని పట్టపగలే ఖూనీ చేస్తున్నారని ఆరోపించారు. వరుసగా రెండో రోజు కూడా చంద్రబాబు ప్రభుత్వం శాంతిభద్రతలను నిర్వీర్యం చేసిందని విమర్శించారు. అధికార పార్టీ తెలుగుదేశం శ్రేణులకు అండగా పోలీసు యంత్రాంగాన్ని ఉపయోగించుకుంటున్నారని ఆరోపిస్తూ, రాష్ట్రంలో రాజకీయ హింస పెరిగిపోయిందని మండిపడ్డారు. ఈ పరిణామాలతో రాష్ట్రంలో జంగిల్ రాజ్ కొనసాగుతోందని విమర్శించారు. ఈ మేరకు ఓ వీడియోను సామాజిక మాధ్యమాల్లో పంచుకున్న వైఎస్ జగన్, ఆంధ్రప్రదేశ్‌లో రాష్ట్రపతి పాలన విధించాలని డిమాండ్ చేశారు.