డిసెంబర్ నుంచి నిత్యావసర వస్తువుల ధరలు పెరిగే అవకాశం!
ముడి సరుకుల ఖర్చులు పెరగడమే కారణం.. ఆహార పదార్థాలు, పానీయాలు, వ్యక్తిగత సంరక్షణ ఉత్పత్తులపై ధరల భారం పడే సూచనలు
ధరల పెరుగుదలతో ఇబ్బందులు పడుతున్న ప్రజలకు మరో షాక్ తగిలే అవకాశం కనిపిస్తోంది. నిత్యం వినియోగించే వస్తువులను తయారు చేసే ఎఫ్‌ఎంసీజీ కంపెనీలు మరోసారి ధరలను పెంచే యోచనలో ఉన్నట్లు తెలుస్తోంది. జూలై–సెప్టెంబర్ త్రైమాసికంలో ముడి సరుకుల ఖర్చులు పెరగడంతో కంపెనీలపై అదనపు భారం పడిందని చెబుతున్నాయి.
దసరా, దీపావళి పండుగల సీజన్‌లో వినియోగదారుల గిరాకీ తగ్గకుండా ఉండేందుకు ప్రస్తుతం ధరల పెంపును వాయిదా వేస్తున్నట్లు కంపెనీలు భావిస్తున్నాయి. అయితే పండుగల సీజన్ ముగిసిన తర్వాత, డిసెంబర్ నుంచి ధరల పెంపు అమలు చేసే అవకాశాలున్నట్లు సమాచారం.
ఆహార పదార్థాలు, పానీయాలు, వ్యక్తిగత సంరక్షణ వస్తువులు, గృహ వినియోగం, పరిశుభ్రతకు సంబంధించిన ఉత్పత్తుల ధరలు పెరిగే అవకాశం ఉంది. అయితే ఏయే ఉత్పత్తుల ధరలు ఎంత మేరకు పెరుగుతాయనే దానిపై ఇంకా స్పష్టత రావాల్సి ఉంది. కంపెనీల నిర్ణయాలు వెలువడిన తర్వాతే ధరల పెంపుపై పూర్తి వివరాలు వెల్లడయ్యే అవకాశం ఉంది.
ఇప్పటికే పెరిగిన నిత్యావసరాల ధరలతో ఇబ్బందులు ఎదుర్కొంటున్న కుటుంబాలపై ఈ పరిణామం అదనపు ఆర్థిక భారాన్ని మోపే అవకాశముంది.
