విజయవాడ శివార్లలో రూ.5.84 కోట్ల బంగారం, విదేశీ కరెన్సీ పట్టివేత

విజయవాడ, అక్టోబర్ 21: ఆంధ్రప్రదేశ్‌లోని విజయవాడ శివార్లలో డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) అధికారులు భారీగా బంగారం, విదేశీ కరెన్సీని స్వాధీనం చేసుకున్నారు. పట్టుబడిన సొత్తు విలువ మొత్తం రూ.5.84 కోట్లుగా గుర్తించారు. బంగ్లాదేశ్ నుంచి కోల్‌కతా మీదుగా హైదరాబాద్‌కు బంగారాన్ని అక్రమంగా తరలిస్తున్నట్లు అధికారులు గుర్తించినట్లు సమాచారం. తనిఖీల్లో భాగంగా ఓ స్కార్పియో వాహనాన్ని ఆపి పరిశీలించగా, అందులో ఏర్పాటు చేసిన రహస్య అరలో బంగారం, 60 వేల అమెరికన్ డాలర్లు, 21,500 యూరోలు లభించాయి. స్వాధీనం చేసుకున్న బంగారం, విదేశీ కరెన్సీ విలువ కలిపి రూ.5.84 కోట్లుగా అధికారులు అంచనా వేశారు. ఈ అక్రమ రవాణా వెనుక ఎవరున్నారు, బంగారం ఎక్కడి నుంచి సేకరించారు, ఎవరికి తరలిస్తున్నారు అనే అంశాలపై అధికారులు దర్యాప్తు చేస్తున్నట్లు సమాచారం.