సెల్ఫీ వీడియోతో గూగుల్ ఖాతాలోకి లాగిన్.. కొత్త ఫీచర్ అందుబాటులోకి
గూగుల్ తన వినియోగదారుల ఖాతాల భద్రతను మరింత మెరుగుపరిచే దిశగా 'సెల్ఫీ వీడియో వెరిఫికేషన్' అనే కొత్త ఫీచర్ను ప్రవేశపెట్టింది. ఈ సదుపాయం ద్వారా వినియోగదారులు ఖాతాలోకి లాగిన్ కావడం లేదా మర్చిపోయిన ఖాతాను తిరిగి పొందడం మరింత సులభం కానుంది.
ఈ ఫీచర్లో వినియోగదారు తన ముఖాన్ని చూపిస్తూ, సూచనల ప్రకారం తలను స్వల్పంగా కదిలిస్తూ ఒక చిన్న సెల్ఫీ వీడియోను రికార్డ్ చేయాల్సి ఉంటుంది. ఆ వీడియో ఆధారంగా వినియోగదారుడి గుర్తింపును ధృవీకరించి ఖాతాకు ప్రాప్యత కల్పిస్తుంది.
గూగుల్ తెలిపిన వివరాల ప్రకారం, ఈ వీడియోను సురక్షితంగా క్లౌడ్లో నిల్వ చేస్తారు. కృత్రిమ మేధస్సు ఆధారిత సాంకేతికతతో పాటు డీప్ఫేక్ మోసాలను గుర్తించే వ్యవస్థను ఉపయోగించి భద్రతను మరింత పటిష్ఠం చేశారు. అలాగే, వినియోగదారులు అవసరమైతే ఖాతా సెట్టింగ్లలోకి వెళ్లి ఈ వీడియోను ఎప్పుడైనా తొలగించుకునే అవకాశం కూడా ఉంటుంది.
ఈ కొత్త ఫీచర్తో పాస్వర్డ్ మరిచిపోయిన సందర్భాల్లో ఖాతా రికవరీ ప్రక్రియ వేగవంతం కావడంతో పాటు, నకిలీ గుర్తింపుల ద్వారా జరిగే మోసాలను కూడా తగ్గించవచ్చని గూగుల్ భావిస్తోంది.
