ఖేత్ బచావో అభియాన్‌లో రైతులకు శాస్త్రవేత్తల సూచనలు
- ఖేత్ బచావో అభియాన్‌లో రైతులకు శాస్త్రవేత్తల సూచనలు
- ఎల్‌నినో నేపథ్యంలో ఆరుతడి పంటలకు ప్రాధాన్యం ఇవ్వాలి..
- నేల ఆరోగ్యాన్ని కాపాడుకోవాలి
చిట్యాల (ఎన్‌ టుడే న్యూస్‌): ఎల్‌నినో పరిస్థితుల నేపథ్యంలో నీటి లభ్యతను దృష్టిలో ఉంచుకొని ఆరుతడి పంటల సాగుకు ప్రాధాన్యం ఇవ్వాలని మెట్ట పరిశోధన సంస్థ శాస్త్రవేత్తలు రైతులకు సూచించారు. నల్గొండ జిల్లా చిట్యాల మండలం చిన్నకాపర్తి గ్రామంలో శుక్రవారం కేంద్ర ప్రభుత్వ ‘ఖేత్ బచావో అభియాన్’ కార్యక్రమంలో భాగంగా నిర్వహించిన అవగాహన కార్యక్రమంలో వారు మాట్లాడారు.
హైదరాబాద్‌లోని జాతీయ మెట్ట పరిశోధన సంస్థ ప్రిన్సిపల్ సైంటిస్ట్ డా. ఏవీఎం సుబ్బారావు, సీనియర్ సైంటిస్ట్ డా. కీర్తిక ముఖ్య అతిథులుగా పాల్గొన్నారు. ‘పొలాలను కాపాడండి–రైతులను బలోపేతం చేయండి’ అనే నినాదంతో నిర్వహించిన ఈ కార్యక్రమంలో స్థిరమైన వ్యవసాయ పద్ధతుల ప్రాధాన్యాన్ని వివరించారు.
రైతులు సమతుల్య ఎరువులను వినియోగిస్తూ నేల ఆరోగ్యాన్ని కాపాడుకోవాలని శాస్త్రవేత్తలు సూచించారు. భూసారాన్ని పరిరక్షిస్తూ ఆరోగ్యకరమైన పంటలను సాగు చేయడం ద్వారా వ్యవసాయాన్ని స్థిరమైన ఆదాయ వనరుగా మార్చుకోవాలని పిలుపునిచ్చారు.
ఈ సందర్భంగా మండల వ్యవసాయ అధికారి పగిడిమర్రి బాబు మాట్లాడుతూ, నీటి వినియోగం అధికంగా ఉండే వరి సాగుకు బదులుగా పెసర, మినుము, జొన్న, నువ్వులు, వేరుశనగ వంటి తక్కువ నీరు అవసరమయ్యే పంటలను సాగు చేసే అవకాశాలను పరిశీలించాలని రైతులకు సూచించారు. భూగర్భ జలాల లభ్యత, వర్షపాతం పరిస్థితులను బట్టి పంటలను ఎంపిక చేసుకోవాలని తెలిపారు.
ఆరుతడి పంటలకు అవసరమైన విత్తనాలను వ్యవసాయ శాఖ ద్వారా సమకూర్చనున్నట్లు ఆయన వెల్లడించారు. రైతులు నీటి లభ్యతను అంచనా వేసుకొని ప్రత్యామ్నాయ పంటల సాగుపై దృష్టి సారించాలని కోరారు.
ఈ కార్యక్రమంలో వ్యవసాయ విస్తరణ అధికారి వాసుదేవ్, చిన్నకాపర్తి గ్రామ రైతులు తదితరులు పాల్గొన్నారు.
