రెండు రోజులుగా నిలిచిన సేవలు.. గంటల తరబడి వేచి చూసినా కాని పనులు

హన్మకొండ: జిల్లా వ్యాప్తంగా రిజిస్ట్రేషన్ కార్యాలయాల్లో గత రెండు రోజులుగా సర్వర్ సమస్యలు తలెత్తడంతో ప్రజలు తీవ్ర ఇబ్బందులు ఎదుర్కొంటున్నారు. భూముల రిజిస్ట్రేషన్లు, వివాహ రిజిస్ట్రేషన్ల కోసం కార్యాలయాలకు వచ్చినవారు స్లాట్లు బుక్ చేసుకోలేకపోతున్నారు.

గంటల తరబడి వేచి చూసినా పనులు పూర్తికాకపోవడంతో పలువురు నిరాశతో వెనుదిరుగుతున్నారు. దూర ప్రాంతాల నుంచి వచ్చినవారికి ప్రయాణ ఖర్చులతో పాటు సమయం కూడా వృథా అవుతోంది. సర్వర్ సమస్యల కారణంగా తమ పనులు నిలిచిపోవడంతో ప్రజలు అసహనం వ్యక్తం చేస్తున్నారు.

సంబంధిత అధికారులు వెంటనే స్పందించి సర్వర్ సమస్యను పరిష్కరించి, రిజిస్ట్రేషన్ సేవలను యథావిధిగా అందుబాటులోకి తీసుకురావాలని ప్రజలు కోరుతున్నారు.