సీఈఐఆర్‌ పోర్టల్‌తో ఆరు మొబైల్‌ ఫోన్ల రికవరీ
- బాధితులకు ఫోన్లు అందజేసిన లక్షెట్టిపేట పోలీసులు
- పోలీసు సిబ్బందికి కృతజ్ఞతలు తెలిపిన బాధితులు
లక్షెట్టిపేట | ఎన్ టుడే న్యూస్‌:
లక్షెట్టిపేట పోలీస్‌స్టేషన్‌ పరిధిలో వివిధ కారణాలతో పోగొట్టుకున్న ఆరు మొబైల్‌ ఫోన్లను పోలీసులు విజయవంతంగా రికవరీ చేశారు. సీఈఐఆర్‌ (CEIR) పోర్టల్‌ ద్వారా సాంకేతిక పరిజ్ఞానాన్ని వినియోగించి ఫోన్ల ఆచూకీ గుర్తించినట్లు ఎస్‌ఐ సురేశ్‌ తెలిపారు.
మాణిక్యం, చింతం శ్రీధర్‌, ఎడ్ల గంగన్న, పర్వీన్‌, అశోక్‌, మహర్షి తదితరులు వివిధ పనుల నిమిత్తం లక్షెట్టిపేట పట్టణానికి వచ్చిన సమయంలో తమ మొబైల్‌ ఫోన్లను పోగొట్టుకున్నారు. బాధితుల ఫిర్యాదులపై స్పందించిన పోలీసులు, సీఈఐఆర్‌ పోర్టల్‌ ద్వారా దర్యాప్తు చేపట్టారు. కానిస్టేబుల్‌ సంజీవ్‌కుమార్‌ సాంకేతిక పరిజ్ఞానాన్ని ఉపయోగించి ఫోన్ల ఆచూకీ గుర్తించడంలో కీలకంగా వ్యవహరించారు.
రికవరీ చేసిన ఆరు మొబైల్‌ ఫోన్లను శనివారం పోలీస్‌స్టేషన్‌లో బాధితులకు అందజేశారు. ఎస్‌ఐ సురేశ్‌ చేతుల మీదుగా ఫోన్లను వారికి అప్పగించారు.
పోగొట్టుకున్న తమ ఫోన్లు తిరిగి లభించడంతో బాధితులు ఆనందం వ్యక్తం చేశారు. పోలీసుల చొరవకు, సహకరించిన సిబ్బందికి ప్రత్యేక కృతజ్ఞతలు తెలిపారు. మొబైల్‌ ఫోన్లు పోగొట్టుకున్నవారు ఫిర్యాదు చేయడంతో పాటు సీఈఐఆర్‌ పోర్టల్‌ సేవలను వినియోగించుకోవచ్చని పోలీసులు సూచించారు.
