ఆయుధ భాండాగారం, పోలీసు వాహనాలకు ప్రత్యేక పూజలు
ప్రజలకు, పోలీసు సిబ్బందికి, వారి కుటుంబ సభ్యులకు విజయదశమి శుభాకాంక్షలు తెలిపిన పోలీస్ కమిషనర్ ఎన్. శ్వేత
వరంగల్: విజయదశమి పర్వదినాన్ని పురస్కరించుకుని వరంగల్ పోలీస్ కమిషనరేట్‌లో ఆయుధ భాండాగారం, పోలీసు వాహనాలకు ప్రత్యేక పూజలు నిర్వహించారు. ప్రజలు ప్రశాంత వాతావరణంలో, ఆనందోత్సాహాలతో పండుగను జరుపుకోవాలని పోలీస్ కమిషనర్ ఎన్. శ్వేత ఆకాంక్షించారు.
మంగళవారం ఉదయం స్థానిక పోలీస్ హెడ్‌క్వార్టర్స్‌లోని ఆయుధ భాండాగార మందిరంలో వేద పండితుల ఆధ్వర్యంలో దుర్గామాత సన్నిధిలో సంప్రదాయబద్ధంగా ఆయుధ పూజలు నిర్వహించారు. చెడుపై మంచి సాధించిన విజయానికి ప్రతీకగా నిలిచే విజయదశమి సందర్భంగా ఈ కార్యక్రమం చేపట్టారు. అనంతరం సాయుధ పోలీసు విభాగం, మోటార్ ట్రాన్స్‌పోర్ట్ విభాగం సిబ్బందితో కలిసి పోలీసు వాహనాలకు ప్రత్యేక పూజలు చేశారు. జమ్మి చెట్టుకు కూడా పూజలు నిర్వహించారు.
ఈ సందర్భంగా పోలీస్ కమిషనర్ ఎన్. శ్వేత మాట్లాడుతూ ప్రజలందరికీ, పోలీసు సిబ్బందికి, వారి కుటుంబ సభ్యులకు విజయదశమి శుభాకాంక్షలు తెలిపారు. వరంగల్ పోలీస్ కమిషనరేట్ పరిధిలో శాంతిభద్రతలను కాపాడుతూ ప్రజలు ప్రశాంతంగా పండుగలు జరుపుకునేలా పోలీసు శాఖ నిరంతరం కృషి చేస్తోందని చెప్పారు.
పోలీసు శాఖలో ఆయుధాలు కీలక పాత్ర పోషిస్తాయని, విజయదశమి రోజున ఆయుధాలకు ప్రత్యేక పూజలు నిర్వహించడం సంప్రదాయంగా వస్తోందని తెలిపారు. ఈ పర్వదినం ప్రజల జీవితాల్లో విజయాలు, సుఖసంతోషాలు నింపాలని ఆకాంక్షించారు.
ఈ కార్యక్రమంలో ఈస్ట్ జోన్ డీసీపీ అంకిత్ కుమార్, సెంట్రల్ జోన్ డీసీపీ ధార కవిత, అడిషనల్ డీసీపీ (అడ్మినిస్ట్రేషన్) రాయల ప్రభాకర్ రావు, అడిషనల్ డీసీపీ (క్రైమ్స్) బాలస్వామి, ఆర్మ్డ్ రిజర్వ్ అడిషనల్ డీసీపీలు సురేష్, శ్రీనివాస్, ఆర్మ్డ్ రిజర్వ్ ఏసీపీలు అంతయ్య, సురేంద్ర, రిజర్వ్ సబ్‌ఇన్‌స్పెక్టర్లు స్పర్జన్ రాజ్, సతీష్, శ్రీధర్, మోటార్ ట్రాన్స్‌పోర్ట్ విభాగం సిబ్బంది తదితరులు పాల్గొన్నారు.
