తుఫాను హెచ్చరికల నేపథ్యంలో రైతులు అప్రమత్తంగా ఉండాలి మూడు రోజుల పాటు వరి కోతలు వాయిదా వేసుకోవాలిఏవో బి శివశంకర్

పంట నష్ట నివారణకు తగిన జాగ్రత్తలు తీసుకోవాలి చాట్రాయి మండల వ్యవసాయ అధికారి బి. శివశంకర్ ఏలూరు జిల్లా, నూజివీడు నియోజకవర్గం చాట్రాయి మండలంలో ప్రస్తుత ఖరీఫ్‌ 2026 సీజన్‌లో సుమారు 10 వేల ఎకరాల్లో వరి, పత్తి, మిరప పంటలను రైతులు సాగు చేశారు. ప్రస్తుతం చాట్రాయి, బూరుగుగూడెం, ఆరుగొలనుపేట గ్రామాల్లో వరి పంట కోత దశకు చేరుకోగా, మిగిలిన గ్రామాల్లో మరో పది రోజుల్లో కోతకు వచ్చే అవకాశం ఉంది. ఈ నేపథ్యంలో ఆర్నాబ్ తుఫాను హెచ్చరికల దృష్ట్యా రైతులు అప్రమత్తంగా ఉండాలని చాట్రాయి మండల వ్యవసాయ అధికారి బి. శివశంకర్ సూచించారు. రానున్న మూడు రోజుల పాటు వరి కోతలను వాయిదా వేసుకోవడం ద్వారా పంట దిగుబడిపై వర్షాల ప్రభావాన్ని తగ్గించుకోవచ్చని తెలిపారు. పొలాల్లో అధికంగా చేరిన వర్షపు నీటిని కాలువల ద్వారా బయటకు పంపించేలా చర్యలు తీసుకోవాలని సూచించారు. ఇప్పటికే కోసిన వరి ధాన్యాన్ని సురక్షిత ప్రాంతాల్లో ఆరబెట్టాలని, వర్షం పడే అవకాశం ఉన్నప్పుడు టార్పాలిన్లతో పూర్తిగా కప్పి ఉంచాలని కోరారు. ధాన్యం తడవకుండా జాగ్రత్తలు తీసుకోవడం ద్వారా నాణ్యత దెబ్బతినకుండా, పంట నష్టాన్ని తగ్గించుకోవచ్చని పేర్కొన్నారు. వాతావరణ శాఖ జారీ చేసే తుఫాను హెచ్చరికలు, వ్యవసాయ శాఖ సూచనలను రైతులు తప్పనిసరిగా పాటిస్తూ తమ పంటలను కాపాడుకోవాలని బి. శివశంకర్ విజ్ఞప్తి చేశారు.